Doha:-Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaam Cabdi Cali, iyo wafdi uu hoggaaminayo ayaa Doha kaga qayb-galay kalfadhigii koowaad ee Guddiga Wadajirka ah ee Soomaaliya iyo Qatar.

Labada dowladood ayaa guddigan u aasaasay in lagu xoojiyo xiriirka saaxiibtinimo iyo iskaashiga istiraatiijiga ah ee ka dhexeeya Soomaaliya iyo Qatar.

Intii lagu guda jiray kulanka, Wasiir Mudane Cabdisalaam Cabdi Cali iyo Wasiiru-dawlaha Arrimaha Dibadda ee Qatar, Mudane Soltan bin Saad Al-Muraikhi, ayaa kala saxiixday heshiisyo dhowr ah oo muhiim u ah horumarinta iskaashiga labada dal

1: Heshiiska Hidaha iyo Dhaqanka , ee Wasaaradda Waxbarashada, Hidaha iyo Tacliinta Sare

Soomaaliya iyo Qatar waxay iska kaashan doonaan xoojinta iskaashiga maktabadaha iyo hay’adaha kaydka taariikhiga ah, abaabulka xafladaha dhaqanka iyo bandhigyada fannaaniinta, gudbinta iyo kobcinta aqoonta farshaxanka iyo dhaqanka, iyo ka qaybgalka bandhigyada buugaagta caalamiga ah ee ay wada qabtaan labada waddan.

2: Heshiiska Kastamada (Wasaaradda Maaliyadda)

Heshiisku wuxuu kor u qaadaya hirgelinta sharciga kastamka, xakamaynta iyo la dagaallanka dembiyada kastamka, hubinta qiimeynta saxda ah ee canshuuraha iyo kharashyada, ilaalinta habraacyada iyo xeerarka kastamka, iyo la dagaallanka xadgudubyada iyo tahriibinta, iyadoo la tixgelinayo heshiisyada heer gobol iyo caalami.

3: Heshiiska Dhalinyarada, Wasaaradda Dhalinyarada iyo Ciyaaraha

Heshiisku wuxuu xoojin doonaa iskaashiga iyo is-dhaafsiga ka-qaybgalayaasha ururada dhalinyarada, ka qaybgalka shirarka iyo siminaarada, sahaminta xeryaha dhalinyarada, iyo tababarka maaraynta mashruuca iyo xirfadaha hoggaamineed.

4: Heshiiska Beeraha (Wasaaradda Beeraha iyo Waraabka )

Soomaaliya iyo Qatar waxay iska kaashan doonaan xoojinta wax soo saarka beeraha iyo cuntada, is-dhaafsiga khibradaha iyo xogaha sayniska, abaabulka shirarka iyo siminaarada, isticmaalka teknoolojiyada casriga ah, bacriminta, iyo maareynta kaydinta iyo aqalka dhirta lagu koriyo(green House).

Heshiisyadani waxay astaan u yihiin go’aanka labada dowladood ee ku aaddan xoojinta iskaashiga istiraatiijiga ah ee dhinacyada dhaqanka, dhalinyarada, beeraha, iyo kastamka, iyagoo ka tarjumaya himilo wadajir iyo horumar waara.

Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta ka qeyb galay munaasabad lagu xusayay Maalinta Qarannimada dalka aan walaalaha nahay ee Qatar oo lagu qabtay magaalada Muqdisho, taas oo laga soo hormariyey waqtigeeda.

Munaasabaddan, oo sanad walba la xuso 18-ka December, ayaa ka tarjumaysa midowga Qatar ee sanadkii 1878, waana maalin qaran taas oo la asteeyey 21-kii Juun 2007, iyadoo ay ku suntan tahay xusuusta Aasaasaha Qatar iyo halgankii taariikhiga ahaa ee lagu dhisay dalkaas.

Ra’iisul Wasaare Xamsa ayaa ugu hambalyeeyey Dowladda Qatar munaasabaddaan, isaga oo uga mahad celiyey taageerada joogtada ah ee ay la garab taagan tahay shacabka iyo Dowladda Soomaaliya, waxaana uu xusay in xiriirka labada dal uu yahay mid walaaltinimo, iskaashi iyo horumar wadaag ah.

Ra’iisul Wasaaraha dalka ayaa tilmaamay in xiriirka diblomaasiyadeed, ganacsi iyo horumarineed ee u dhexeeya Soomaaliya iyo Qatar uu sii xoogaysanayo, taas oo ka tarjumaysa danaha bulshada labada dal iyo himilooyinka horumarineed ee wadajirka ah.

Ra’iisul Wasaare ku-xigeenka Xukuumadda Federaalka Soomaaliya Mudane Saalax Axmed Jaamac, ayaa maanta daahfuray Shirweynaha Bulshada Rayidka Soomaaliyeed, oo looga hadlayo dejinta qorshaha istiraatiijiga ah ee shanta sano ee soo socota, si Bulshada Rayidka ah ay uga qayb qaataan horumarinta hey’adaha dowliga ah.

Ra’iisul Wasaare ku-xigeenka, ayaa adkeeyey muhiimadda Bulshada Rayidka ah iyo kaalintooda nabadaynta, horumarinta bulshada iyo arrimaha bini’aadantinimo, isaga oo bogaadiyey talooyinka iyo waxqabadyada muhiimka ah ee ay ku soo bandhigeen shirka, isla markaana ay Xukuumaddu talooyinkaas mudnaanta siin doonto hirgalintooda, maadaama ay lafdhabar u yihiin dowlad-dhiska iyo horumarka dalka.

Shirkan oo socon doona muddo saddex maalin ah, ayaa waxaa ka qeyb galay furitaankiisa wasiirro ka tirsan Xukuumadda, masuuliyiin ka socday Bulshada Rayidka ah iyo wakiillo ka ka tirsan Beesha Caalamka.