Dhuusamareeb-(SONNA)- Wasiirka Wasaaradda Ganacsiga iyo Warshadaha XFS, Jibriil Cabdirashid Xaaji ayaa maanta soo xiray shir looga hadlayey hirgalinta hannaanka casriga ah ee diiwaangalinta ganacsiga oo magaalada Dhuusamareeb ka socoday maalmihii lasoo dhaafay.

Shirkan oo u dhexeeyay Wasaaradaha Ganacsiga iyo Warshadaha ee dawladda Federaalka Soomaaliya, maamul goboleedyada dalka iyo gobolka Banaadir ayaa laga soo saaray qodobbo

In la mideeyo Documentiyada ganacsiga lana qaato hal nooc oo ay bixineyso wasaaradda ganacsiga iyo Wershedaha DFS , kuwa maamul goboleedyada iyo gobolka Banaadir, isla markaasna ay Documentiyadu ahaadaan kuwo ka mideysan nashqadaha iyo xogta ku qoran oo ay ku kala duwanaadaan saxiixa iyo astaanta.

In wasaaradda Ganacsiga Soomaaliya, kuwa maamul goboleedyada iyo gobolka Banaadir ay dib u eegis ku sameeyaan sharciga shirkadaha oo horay loo ansixiyay 2019-kii, si loogu daro qeybaha muhiimka u ah hannaanka diiwaan gelinta ganacsiyada dalka.

In wasaaradda ganacsiga iyo warshadaha DFS, Wasaaradaha Ganacsiga maamul goboleedyada iyo maamulka gobolka Banaadir ay si wada jir ah u diyaariyaan heer nidaamiyeyaasha sharciga shirkadaha iyo hannaanka loo maraayo diiwaan gelinta ganacsiyada dalka.

In Wasaaradda ganacsiga DFS , kuwa maamul goboleedyada dalka iyo Gobolka Banaadir ay ka qeyb qaataan dib u eegista iyo horumarinta sharciga shatiyada Qaranka oo ay dhowaan wasaaradda ganacsigu kasoo celisay golaha wasiirrada XFS.

In Wasaaradda Ganacsiga DFS ay wasaaradaha ganacsiga dowlad goboleedyada iyo maamulka gobolka Banaadir la wadaagto warbixintii qiimeynta ahayd ee laga diyaariyay diiwaan gelinta ganacsiyada kadibna aragtideeda ay ku biiriso wasaarad kasta, si loo gudo galo daadejinta hannaanka ganacsi ee Soomaaliya.

Waxay isku raaceen wasaaradda ganacsiga iyo wershadaha Soomaaliya, kuwa dowlad goboleedyada iyo maamulka Gobolka Banaadir in la billaabo hannaanka diiwaan gelinta ganacsiyada Soomaaliya Saddex bil gudahood, laguna billaabo maamul goboleedka Jubbaland.

In soddon maalmood gudahood lagu dhiso guddi ka kooban Sagaal xubnood oo ka kala imanaya wasaaradda ganacsiga DFS, maamul goboleedyada iyo gobolka Banaadi, guddigaas oo ay shaqadiisu noqon doonto diyaarinta xeer lagu maamulo xallinta qilaafaadka ku salaysan shirkadaha isku magaca ah ee ka diiwaan gashan maamullada kala duwan ee dalka, guddigaas oo qorshe howleedkiisu uu soo dhamaytirmayo ka hor daadejinta hannaanka ganacsiyada Soomaaliya .

Iyo in wasaaradda ganacsiga DFS ay diyaariso abla-ableynta ganacsiga hab waafaqsan jaantusyada caalamiga ah kuna salaysan tirsi lambar International Classifications Course.

Wasiirka Wasaaradda Ganacsiga iyo Warshadaha XFS, Jibriil Cabdirashid Xaaji oo soo xiray shirka ayaa tallaabo waxtar weyn u leh dalka ku tilmaamay heshiiskan ay wada gaareen wasaaradda ganacsiga, kuwa dowlad goboleedyada iyo maamulka gobolka Banaadir.

Guddoomiye ku xigeenka koowaad ee Aqalka Sare, Mudane Cali Shacbaan Ibraahim, ayaa shir guddoomiyay kulanka 5-aad ee kalfadhiga labaad ee guddiga joogtada Aqalka Sare oo ajandihiisu ahaa dardar gelinta ansixinta sharciyada golaha horyaala iyo muddaynta waqtiga fasaxa.

Dood iyo falanqayn kadib guddiga joogtada Aqalka Sare, ayaa isla qaatay in maalmo dheeraad ah lagu daro waqtigii uu xirmi lahaa Kalfadhiga labaad ee Aqalka Sare lana gaarsiiyo 20-ka Maarso, si loo dhameeystiro sharciyada Akhrinta maray.

Kulanka waxaa goobjoog ahaa Guddoomiye ku xigeenka labaad ee Aqalka Sare, Mudane Cabdullaahi Cali Xersi (Timacadde).

Wasiirka wasaaradda Kalluumeysiga iyo Dhaqaalaha Buluugga ah ee Xukuumadda Federaalka Soomaaliya ayaa Golaha Aqalka Sare ee Baarlamaanka dalka ka hor aqriyey hadaljeedin ku saabsan Hindise Sharciyeedka Horumarinta iyo Maareeynta Kalluumeysiga Soomaaliyeed.

Wasiirka ayaa Golaha la wadaagay faahfaahinta wax ka badalka lagu sameeyey sharciga waxaana uu hoga tusaaleyey ahmiyadda ee sharcigan u lee yahay horumarinta iyo Maareeynta Kalluumeysiga Soomaaliyeed.

“Sharcigan waxa uu soo maray marxalado kala duwan oo ah la tashiyo iyo turxaan bixin waxaana ka shaqeeyey khuburo isugu jira wasaaradda iyo xeel-dheereyaal dhinaca Kalluumeysiga iyo Badaha ah, waxaan aamin sanahay in sharcigan uu ahmiyad  weyn u lee yahay badbaadinta iyo ilaalinta hantida umadda Soomaaliyeed gaar ahaan Kheyraadka Kalluunka ee dalkeenna”. Ayuu wasiirka Ahmed.

Waxa uu intaa ku daray  “Sharcigii hore wuxuu ka koobnaa siddeed (8 Cutub iyo 44 qodob. Dib u habayn ka dib sharciga aan maanta ka hor aqriyey Golaha Shacabka wuxuu ka kooban yahay, afar iyo toban (14) Cutub iyo 162 qodob, taas oo muujineysa isbadalka lagu sameeyey sharcigan kaas oo aan rajeyneyno in uu daboolo baahi weyn oo loo qabo sharci nuucaan oo kale ah, dalkana siinaya sharci kalluumeysi oo dhamaystiran kana jawaabaya baahida sharci ee khayraadka kalluunka dalkeenna”

Ugu dambeyn wasiirka ayaa xildhibaannada Golaha Aqalka Sare ee dalka ka codsaday in ay iyaga oo gudanaya waajibaadkooda sharci dajin ay meelmariyaan sharcigan.

Wasiiru dowlaha Wasaaradda Amniga XFS , Maxamed Cali Xagaa ayaa golaha aqalka sare uga mahad celiyay meel marinta Sharciga la dagaallanka Argagixisada, isagoo golaha ku bogaadiyay sida qiimaha iyo sharafta leh ee ay u ansixiyeen sharciga oo muhiim u ah dagaalka ka dhanka ah khawaarijta.

Wasiir Xagaa ayaa sheegay in sharcigan uu is-waafajinayo laba arrimood oo kala ah in dambiilaha la qabto muwaaddinka kalana uu nabad galo iyo in uu sharcigani yahay mid si toos ah u abbaarayo cidda loo sameeyay ee Daacish iyo Al-shabaab oo qayb ka ah Al-Qaacidda.

Wuxuu sheegay Wasiirku haddii loo baahdo in cid kale lagu asteeyo magaca argagixiso ay wasaaradda oo kaashanaysa hay’adaheeda u xil-saaran amniga usoo gudbin doonaan golaha wasiirrada si uu u maro labada Aqal ee Baarlamaanka.