Muqdisho,(Wargeyska Dalka):- Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ka qayb-galay, Dabaal-dagga sannad guurada 82-aad ee ka soo wareegtay aasaaskii Ciidanka Booliska Soomaaliyeed ayaa Hambalyo u diray Sarreeyayaasha, Saraakiisha sare, Saraakiisha, Saraakiil xigeenada, Kormeereyaasha, Alifleyda iyo Dableyda Ciidanka Booliska Soomaaliyeed.

Madaxweynaha ayaa ku bogaadiyay Taliska Ciidanka Booliska Soomaaliyeed, guulaha muuqda ee laga xaqiijiyay sugidda amniga Dalka, dib u dhiska Xarumaha Booliska, tayeynta iyo horumarinta Ciidamada, isaga oo faray in ay u diyaar garoobaan gudashada waajibaadkooda ku aaddan ilaalinta Nabad-Galyada Doorashooyinka Qof iyo Codka ah ee ka qabsoomaya Gobolka Banaadir.

“Waan hambalyeynayaa shaqada wanaagsan ee Taliska Ciidanka Booliska Soomaaliyeed, ku qabteen waqtiga kooban. Ciidanka Booliska Soomaaliyeed, tan iyo markii la aas-aasay sanadkii 1943-dii, waxa uu u taagnaa ilaalinta nafta, sharafta iyo hantida ummadda Soomaaliyeed, waxaan halkan uga mahadcelinayaa dhammaan ragga iyo dumarka Booliska Soomaaliyeed ee naftooda u huray sugidda amniga dalka”

Madaxweyne Xasan Sheekh ayaa kula dardaarmay Saraakiisha iyo Askarta Ciidanka Booliska Soomaaliyeed in ay si waafaqsan qaanuunka Dalka u gutaan, waajibaadka ka saaran ilaalinta nafta, hantida iyo sharafta muwaadiniinta Soomaaliyeed, waxa uuna xusay in Sarkaal waliba lagula xisaabtami doono shaqada loo idmaday.

Munaasabadda sanad-guurada 82-aad ee aasaaska CBS, waxaa ka qayb galay Wasiiro ka tirsan Xukuumadda Jamhuuriyadda Federaalka Soomaaliya, Xildhibaanno, Taliyeyaasha Ciidamada Qalabka Sida, Taliyeyaashii hore, Danjireyaal iyo marti sharaf kale.

Muqdisho(Wargeyska Dalka):-Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macalin Cabdulle, ayaa maanta magaalada Muqdisho ka furay shir ballaaran oo looga hadlaayo ka-jawaabista abaaraha ka jira dalka.

Shirkan, oo ka socda Xarunta Qaran ee Gurmadka Degdegga ah ee Hay’adda SoDMA, waxaa ka qeyb galaya qaar ka mid ah Wasiirrada Dowlad-Goboleedyada Dalka, Maamulka Gobolka Banaadir, Xafiiska Ra’iisul Wasaaraha, iyo masuuliyiin kale oo heer federaal iyo heer Dowlad-Goboleed ah.

Shirkaan ka furmay Magaaladda Muqdisho, ayaa diiradda waxaa lagu saarayaa qiimeynta xaaladda abaaraha ee dalka, saameynta ay ku yeesheen Nolosha Dadka, iyo sidii si wadajir ah oo Deg-deg ah looga jawaabi lahaa baahiyaha Deg-degga ah ee dadka ay abaaruhu saameeyeen.

Guddoomiyaha Hay’adda SoDMA, Mudane Maxamuud Macalin Cabdulle, ayaa hadal uu ka jeediyay furitaanka shirka ku adkeeyay muhiimadda ay leedahay in Gargaar degdeg ah loo fidiyo Dadka ay abaaruhu saameeyeen, si loo badbaadiyo noloshooda loona yareeyo saameynta musiibada, isaga oo ku baaqay iskaashi iyo isku-duubni dhammaan hay’adaha ay khuseyso arrintan.

Ugu danbeyn Guddoomiyuhu waxa uu sidoo kale tilmaamay in Hay’adda SoDMA ay sii wadi doonto dadaallada Gurmadka iyo isku-xirka hay’adaha kala duwan, si loo xaqiijiyo in Gargaar wax ku ool ah uu gaaro Dadka u baahan ee ku nool deegaanada ay abaaruhu sida daran u saameeyeen.

Muqdisho(Wargeyska Dalka):-Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ka qayb-galay, Xuska sannad guurada 82-aad ee ka soo wareegtay aasaaskii Ciidanka Booliiska Soomaaliyeed ayaa hamblyo u diray Sarreeyaasha, Saraakiisha sare, Saraakiisha, Saraakiil xigeenada, Kormeerayaasha, Alifleyda iyo Dableyda Ciidanka Booliska Soomaaliyeed.

Munaasabaddan ayaa waxaa ka soo qeyb-galay Wasiiro ka tirsan Xukuumadda Jamhuuriyadda Federaalka Soomaaliya, Xildhibaanno, Taliyeyaasha Ciidamada kala duwan sida Xoogga dalka,Sirdoonka,Asluubta ,Taliyeyaashii hore iyo marti sharaf kale.

Warbixinta Toddobaadlaha ee Dowladda Federaalka Soomaaliya Muqdisho, Sabti, 20ka December,2025.

1-Madaxweyne Xasan Sheekh Maxamuud oo booqasho kooban ku tegay magaalada Addis Ababa, halkaas oo uu kulan kula yeeshay Ra’iisul Wasaaraha Ethiopia, Abiy Ahmed Ali.

2-Madaxweyne Xasan Sheekh Maxamuud ayaa Xarunta Madaxtooyada ku qaabilay Wasiirka Horumarinta Iskaashiga Caalamiga iyo Ganacsiga Dibadda ee dalka Sweden Mudane Benjamin Dousa.

3-Madaxweyne Xasan Sheekh Maxamuud ayaa uga tacsiyeeyey qoyska, bulshada Puntland iyo guud ahaan ummadda Soomaaliyeed geerida naxdinta leh ee ku timid Madaxweynihii hore ee Puntland, Marxuum Jaamac Cali Jaamac.

4-Ra’iisul Wasaare Xamsa Cabdi Barre aya soo xiray Shirka 35-aad ee Wasiirrada Gaashaandhigga Bariga Afrika.

5- Ra’iisul Wasaare Hamsa Cabdi Barre ayaa magacaabey Jamaal Maxamed Xasan iyo Ayuub Ismaaciil Yuusuf inay noqdaan Wasiirka Ganacsiga iyo Wasiirka Hawlaha Guud.

6-Ra’iisul Wasaare Xamsa Cabdi Barre ayaa ka qeyb galay munaasabadda xuska 65-guurada xiriirka diblomaasiyadeed ee u dhexeeya Jamhuuriyadda Federaalka Soomaaliya iyo Jamhuuriyadda Dadka Shiinaha, oo lagu qabtay Muqdisho.

7-Ra’iisul Wasaare Xamsa Cabdi Barre, ayaa ka qeyb galay munaasabad xarigga looga jarayey Masraxa Prof. Shariif Saalax Maxamed Calimee Jaamacadda Ummadda Soomaaliyeed.

8-Golaha Wasiirrada Soomaaliya waxeey ka doodeen Wax-ka-beddelka Sharciga Bangiga Dhexe ee Soomaaliya, Xeer-nidaamiyaha Buugga Badmaaxa Soomaaliyeed, Siyaasadda iyo Xeerka Sanduuqa Qaranka ee Horumarinta Waxbarashada (NEDF) iyo Hindise-Sharciyeedyadda Difaaca Qaranka, Xuquuqda Carruurta iyo Arrimaha qoyska.

9-Ra’iisul Wasaare Ku-Xigeenka Soomaaliya Mudane Saalax Axmed Jaamac, ayaa xilka u kala wareejiyay Wasiirka cusub ee Wasaaradda Ganacsiga iyo Warshadaha iyo Wasiirkii hore.

10- Ra’iisul Wasaare Ku-Xigeenka Soomaaliya Mudane Saalax Axmed Jaamac ayaa qaatay Kaarka Cod-bxinta ee ee doorashada, xilli la filayo in dhowaan la qabto doorashada goleyaasha degaanka ee gobolka Banaandir.

11- Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa kulan la yeeshay Safiirka Boqortooyada Ingiriiska u fadhiya Soomaaliya, Mudane Charles Nicholas King.

12- Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaan Cabdi Cali, ayaa furay aqoon-isweydaarsi heer qaran ah oo diiradda lagu saaray ku biirista Soomaaliya ee Habraacyada Dheeraadka ah ee Axdiyada Geneva.

13- Wasiirka Arrimaha Dibadda iyo Iskaashiga Caalamiga, Mudane Cabdisalaan Cabdi Cali, ayaa qaabilay Safiirka Jamhuuriyadda Yemen u fadhiya Soomaaliya, Mudane Fadl Ali Ahmed Al-Hanak.

14- Wasiirka Arrimaha Dibadda iyo Iskaashiga Caalamiga, Mudane Cabdisalaan Cabdi Cali, ayaa qaabilay Madaxa Hay’adda Caalamiga ee Laanqeytra Cas (ICRC) u qaabilsan Soomaaliya, Mudane Antoine Grand.

15- Wasiirka Arrimaha Dibadda iyo Iskaashiga Caalamiga, Mudane Cabdisalaan Cabdi Cali, ayaa qaabilay Safiirka Ethiopia u fadhiya Soomaaliya, Mudane Suleiman Dedefo Woshe.

16- Wasiirka Gaashaandhigga, Mudane Danjire Axmed Macallin Fiqi ayaa Saxiixey Heshiiska Hagaha Hirgelinta Qorshaha 2025 ee lagu xoojinayo ilaalinta carruurta ay saameeyeen colaadaha hubaysan.

17- Wasiirka Gaashaandhigga, Mudane Danjire Axmed Macallin Fiqi, ayaa qaabilay Wasiirka Gaashaandhigga Jamhuuriyadda Jabuuti, Mudane Xasan Cumar Maxamed, oo Muqdisho u yimid ka qeybgalka Kalfadhiga 35-aad ee Wasiirrada Gaashaandhigga ee dalalka ku bahoobay Ciidamada Heeganka Afrikada Bari (EASF).

18- Wasiirka Gaashaandhigga Mudane Danjire Axmed Macallin Fiqi, ayaa qaabilay Wakiilka Gaarka ah ee Xoghayaha Guud ee Qaramada Midoobay u qaabilsan Soomaaliya, Mudane James Swan.

19- Wasiirka Maaliyadda Soomaaliya Mudane Biixi Imaan Cige ayaa magaalada Muqdisho ku soo dhaweeyay Wasiirka Iskaashiga Horumarinta Caalamiga ah iyo Ganacsiga Dibadda ee Dowladda Sweden Mr. Benjamin Dousa .

20-Wasiirka Shaqada iyo Arrimaha Bulshada, Mudane Prof. Salim Cali Ibrow, Ayaa qaabilay wafdi heer sare ah oo ka socday Kozuva Group of Companies, oo ay ka mid tahay shirkadda FAVORI oo maamusha Garoonka Diyaaradaha Aadan Cadde ee Muqdisho.

21- Wasiirka Kalluumaysiga iyo Dhaqaalaha Buluugga, Mudane Axmed Xasan Aadan, ayaa heshiis la saxiixday Shirkadda OYAK ee dalka Turkiga, kuna dhaqan-gelinta Heshiiska Iskaashiga iyo Horumarinta Wax-soosaarka Badda.

22- Wasiiru Dowlaha Wasaaradda Gaashaandhigga, Xildhibaan Cumar Cali Cabdi, ayaa Muqdisho ku soo dhoweeyay Wasiirka Gaashaandhigga Jamhuuriyadda Jabuuti, Mudane Xasan Cumar Maxamed.

23- Wasiiru Dowlaha Wasaaradda Gaashaandhigga, Xildhibaan Cumar Cali Cabdi, ayaa furay Kalfadhiga 35aad ee Caadiga ah ee Guddiga Taliyeyaasha Difaaca iyo Ammaanka ee Ciidanka Heeganka Afrikada Bari (EASF).

24- Wasiiru Dowlaha Wasaaradda Gaashaandhigga, Xildhibaan Cumar Cali Cabdi, ayaa Muqdisho ku soo dhoweeyay Wasiirka Gaashaandhigga Dowladda Rwanda, Mudane Marizamunda Juvenal.

25-Wasiir Ku-Xigeenka Ganacsiga iyo Warshadaha Maxamuud Axmed Cabdullahi (Abukaate), ayaa ka qayb-galay shirkii labaad ee Madasha Ganacsiga ee Heshiiska Xorta ah ee Qaaradda Afrika (AfCFTA) oo ka dhacay Marrakech, Morocco.

26- Wasiir Ku-Xigeenka Arrimaha Dibadda iyo Iskaashiga Caalamiga, Mudane Isaaq Maxamuud Mursal, oo booqasho rasmi ah ku jooga Dalka Serbia, ayaa booqasho ku tagay xarunta weyn ee shirkadda VISARIS, oo ka mid ah shirkadaha ugu horreeya dunida ee soo saara qalabka casriga ah ee raajada (X-ray).

27- Wasiir Ku-Xigeenka Shaqada iyo Arrimaha Bulshada, Marwo Aamina Xuseen Cali, ayaa ka qeyb-gashay Shir ka dhacay magaalada Beydhabo, oo ku saabsanaa Kordhinta Mashaariicda Dhismaha Waddooyinka loo yaqaan “Cobblestone”.

28-Wasaaradda Beeraha iyo Waraabka XFS ayaa magaalada Muqdisho ku qabatay shirka wadatashiga labaad ee dib-u-eegista habraacyada qaran ee nidaamyada cuntada Soomaaliya.

29- Guddoomiyaha Guddiga Doorashooyinka iyo Soohdimaha Qaranka, Mudane Cabdikariin Axmed Xasan, ayaa magaalada Muqdisho tababar uga furay ku dhowaad 90 saxafi oo Soomaaliyeed, kaas oo diiradda lagu saaray Habdhaqanka Warbaahinta ee xiliga Doorashada.

30-Taliyaha Ciidanka Xoogga Dalka Soomaaliyeed, Sarreeye Gaas Odawaa Yuusuf Raage, ayaa shir-guddoomiyay Kalfadhiga 35-aad ee Caadiga ah ee Guddiga Taliyeyaasha Difaaca iyo Ammaanka ee Ciidanka Heeganka Afrikada Bari (EASF), oo ka socda magaalada Muqdisho.

31- Taliyaha Ciidanka Dhulka ee Xoogga Dalka Soomaaliyeed, Sarreeye Guuto Sahal Cabdullaahi Cumar, ayaa Muqdisho ku soo dhoweeyay Taliyaha Ciidanka Dhulka ee Jamhuuriyadda Rwanda, Major General Vincent Nyakarundi.

32- Hay’adda Socdaalka iyo Jinsiyadda ee Jamhuuriyadda Federaalka Soomaaliya ayaa si rasmi ah u soo bandhigtay Warbixin Sanadeedka Waxqabadka ee Sannadka 2025, iyadoo hal-ku-dheggu yahay Xakamaynta Xuduudaheenna – Ilaalinta Dadkeenna.

33- Xoghayaha Joogtada ah ee Xafiiska Ra’iisul Wasaaraha Mudane Kamaal Daahir Guutaale, ayaa daahfuray kulan aqoon-is-weydaarsi ah oo ku saabsan hagaajinta iyo horumarinta nidaamka xeer-dajinta dowladda, si loo horumariyo sharciyada hay’adaha dowliga ah.

34-Xoghayaha Joogtada Wasaaradda Arrimaha Dibadda iyo Iskaashiga Caalamiga, Mudane Xamsa Aadan Xaadow, ayaa qaabilay, Safiirka Jamhuuriyadda Suudaan u qaabilsan u fadhiya Soomaaliya, Mudane Abdulrahman Khalil Ahmed Abakr Afandi.

35- Xoghayaha Joogtada ah ee Wasaaradda Cadaaladda iyo Arrimaha Dastuurka Mudane Faysal Aadan Xasan ayaa ka qayb-galay Shirka 11aad ee Dowladaha Xubnaha ka ah Heshiiska Qaramada Midoobay ee La-dagaallanka Musuqmaasuqa (COSP 11).

36- Hay’adda NISA oo kaashanaya saaxiibada caalamka, ayaa hawlgallo qorsheysan ka fuliyay degaanka Tardo ee Gobolka Hiiraan, halkaas oo lagu dilay illaa sagaal dhagarqabe oo ka tirsanaa Khawaarijta Al-Shabab.