Wasaaradda Maaliyadda oo kaashaneysa hoggaanka Hey’addaha Garsoorka ayaa xeer ka soo saartay Ajuurada (Lacagaha) laga qaadaayo adeegyada Maxkamaddaha iyo Khidmada Diiwangelinta Qareennada.

Kaddib kulan wadatashi ah oo ay yeesheen Wasiirka Maaliyadda,Guddoomiyaha Maxkamadda Sare, Guddoomiyaha Maxkamadda Gobolka Banaadir iyo Guddoomiyaha Maxkamadda Racfaanka, iyo Ururka Qareennada, ayaa waxaa ay Wasaaradda Maaliyadda Xukuumadda Federaalka Soomaaliya ay Xeer-nidaamiye ka soo saartay Ajuurada (Lacagaha) laga qaadaayo adeegyada garsoor oo ay bixiyaan Maxkamaddaha Dalka, Khidmada Diiwangelinta iyo Midda Sanadlaha ee laga rabo Qareennada.

“Maanta waa maalin taariikhi ah, maadama Wasaaradda Maaliyaddu, oo si dhaw ula shaqaynaysa hoggaanka Hay’addaha Garsoorka, wada-tashina la yeelatay Ururka Qareennada, ay soo saartay Xeer-nidaamiyaha Ajuurada Maxkamaddaha, iyo Khidmada Diiwangelinta iyo Midda Sanadlaha ah ee Qareennada”. Ayuu yiri Wasiirka Maaliyadda,  Dr. Cilmi M. Nuur.

Xeer-nidaamiyahaan ayaa waxa uu si cad u qeexayaa khidmaddaha lagu dabaqaayo adeegyada kala duwan ay bixiyaan Maxkamadaha, cidda mas’uul ka ka ah ururinta khidmadahaan iyo sidoo kale koontooyinka bangiyada ee lagu shubayo.

Wasiirka Maaliyadda ayaa sheegay in bixinta khidmadahaan ay muwaadiniinta u sahli doonta in ay u furtaan galal,dacwadaha ay qabaan, walibana ay fursad u helaan in dacwadahoodu ay dhagaystaan saraakiisha garsoor ee awoodda u leh.

Wasiirka Maaliyadda ayaa sidoo kale sheegay in si loo dhiirigaliyo Xirfadda Qareennimada ay ku soo biiraan xirfadlayaan qareenno ah oo cusub, hoos loo dhigay khidmada diiwangelinta ee laga rabo qareennada cusub, iyadoo laga dhigay $ 300 dollar,halka markii hore ay ka ahayd $500 dollar

Wasaaradda Maaliyadda Soomaaliya ayaa sheegtay in la hubin doono in Xeer-nidaamiyuhu u shaqeeyo hab wax ku ool ah, walibana ay Waaxda Canshuuraha Berriga ee Wasaaradda ayaa si joogto ah u korjoogteeyn doonta qaabka loo ururiraanayo khidmadaha la xeeriyay, iyadoo warbixin bille ah loo soo gudbin doono Wasiirka Maaliyadda.

Wafdi uu horkacayo Guddomiyaha Hey’adda Mareynta Masiibooyinka Qaranka Maxamuud Macalin Abdulle oo booqasho kujooga Caasimadda maamulka Puntiland ee Garowe ayaa kulan laqaatay madaxweyne ku xigeenka ahna ku simaha Madaxwaynaha puntiland.

Kulanka ayaa looga wadahadalay xaaladaha Bani’aadannimo ee ka jira deeganada Puntland gaar ahaan xaladaha ay ku sugan yihiin sugan yihiin dadkii ka soo barakacay colaadaha Magaalada Laascanood ee Gobolka Sool.

Sidoo kale, waxay labada dhinac isla garteen in sida ugu dhaqsiyaha badan loo dhagaxdhigo xarunta Howlagalada Gurmadaka deg deg ah taasoo shaqadeedu tahay lataaclida xaaladaha deg deg ah ee dalkeena.

Kulanka ayaa waxaa goobjoog ahaa Wasiirka Wasaaradda Gargaarka Dowlad goboleedka Puntland .

Mas’uuliyiin ka kala socda Israa’iil iyo Falastiin ayaa maanta ku kulmay magaalada loo dalxiis tago ee Sharmal Sheekh ee dalka Masar,halkaas oo ay uga qeybgalayaan wadahadal nabadeed oo ay soo qaban-qaabisay Masar.

Kulanka manta oo ah hal cisho, ayaa waxaa sidoo kale ka qeyb galaya mas’uuliyiin ka kala socda dalalka Masar, Mareykanka iyo Urdun.

Bayaan ay soo saartay wasaaradda arrimaha dibadda Masar ayaa lagu sheegay in wadahadallada looga golleeyahay in lagu taageero wadahadalka u dhexeeya Falastiin iyo Israa’iil si looga shaqeeyo joojinta falalka wata rabshadaha, lana gaaro xasillooni.

Tani waxay fududeyn kartaa abuurista jawi ku habboon dib u soo celinta geeddi-socodka nabadda”, ayaa lagu daray bayaanka.

Wadahadallada ayaa imanaya ka hor bisha Ramadaan, oo lagu wado in ay bilaabmaan dadaal diblumaasiyadeed oo lagu ilaalinayo xaaladda inta lagu jiro bisha barakeysan ee Ramadaan.

Xaalada dhulka ayaa kacsan in ka badan hal sano, waxaana si joogta ah u dhacayay weeraro iyo dilal maalinle ah oo ciidamada Israel ay kula kacayaan dadka reer Falastiin.

Wasiirka Qorsheynta iyo Maalgashiga caalamiga ah ee JFS Maxamuud Cabdiraxmaan Beene beene ayaa maanta heshiis ku saabsan iskaashiga dhanka Maalgashiga ah la saxiixday Wasiirka Maalgashiga iyo Iskaashiga Caalamiga ee Jamhuuriyadda Sudan, Ahlam Madani Mahdi oo shalay soo gaartay Magaalada Muqdisho.

Wasiirka Qorsheynta, Maalgashiga iyo Horumarinta Dhaqaalaha Xukuumada Federaalka Soomaaliya, ayaa maanta daahfuray Madasha Maalgashiga Soomaaliya iyo Suudaan oo muddo labo maalin ah ka socon doonta magaalada Muqdisho.

Madashan ayaa waxa kasoo qeybgalay wafdi ka socday Dowlada Suudaan oo ay hogaaminayso Wasiirka Maalgashiga iyo Iskaashiga Caalamiga, Ahlam Madani Mahdi, iyo Mas’uuliyiin ka tirsan dowlada Soomaaliya iyo shirkado Ganacsi oo ka kala socday labada dal.

Ra’iisul Wasaaraha Xukuumadda Federaalka Soomaaliya Mudane Xamse Cabdi Barre ayaa maanta xafiiskiisa ku qaabilay Safiirka cusub ee Dowladda Itoobiya u fadhiya Soomaaliya Danjire Mukhtaar Maxamed Waare.

Ra’iisul Wasaare Xamse iyo Danjire Waare ayaa ka wada hadlay xoojinta xiriirka iyo iskaashiga labada waddan, gaar ahaan dhinacyada amniga iyo la dagaallanka kooxda Khawaarijta.

Wasiirka Wasaaradda Arrimaha Gudaha, Federaalka iyo Dib u Heshiisiinta xukuumadda federaalka Soomaaliya mudane Axmed Macalin Fiqi  ayaa maanta xafiiskiisa ku qaabilay ergeyga Norway ee Soomaaliya Heidi Elburgi Johansen iyo safiirka dalkaasi u fadhiya Muqdisho Haakon Svane.

Wasiirka iyo ergeyga ayaa kulanka  Inta uu socday,arrimmaha xoogga lagu saaray waxaa ugu weynaa Xasillinta, soo kabashada, dadaallada dib u heshiisiinta iyo arrimo kale.

Guddoomiyaha Golaha Shacabka Baarlamaanka Jamhuuriyadda Federaalka Soomaaliya ahna Ku-simaha Madaxweynaha JFS Mudane Sheekh Aadan Maxamed Nuur (Madoobe) ayaa waxaa uu maanta xafiiskiisa ku qaabilay danjiraha dalka Taliyaaniga u fadhiya Soomaaliya Amb. Alberto Vecchi.

Kulanka Guddoomiyaha iyo safiirka dalka Taliyaaniga ayaa looga hadlay xiriirka labada dal ee taariikhiga ah. Danjiraha ayaa Guddoomiyuhu u soo gudbiyay dhambaal uu ka siday Baarlamaanka dalkiisa ee ku aaddanaa wadashaqeynta labada baarlamaan, isagoo xaqiijiyay in Soomaaliya ay kala shaqeyn doonaan deyn cafinta iyo shuruucda muhiimka u ah dalka ee laga rabo Baarlamaanka Jamhuuriyadda Federaalka Soomaaliya.

Guddoomiye Sheekh Aadan Madoobe ayaa uga mahadceliyay Dowlada Taliyaaniga garab istaaga Dowlada Soomaaliya Iyo sida ay qeyb uga qaadanayan la dagaallanka argagaxisada iyo deyn cafinta, waxaana uu xusay in Baarlamaanka Jamhuuriyadda Federaalka Soomaaliya iyo Baarlamaanka Taliyaaniga xiriir wanaagsan yeelan doonaan dhawaan.