Shirka Madasha Soomaaliya iyo dalalka safka hore oo shalay ka furmay Muqdisho ayaa maanta waxaa ku soo biiray saraakiil militeri oo ka socta, Ethiopia, Djibouti iyo Kenya, waxaana shir guddoomiyay Wasiirka gaashaandhigga Soomaaliya Cabdulqaadir Maxamed Nuur.

Shirkii maanta ayaa diiradda lagu saaray dejinta qorshaha wajiga labaad ee howlgalka, kaas oo dhinacyadu ku gorfeeyeen sida uu noqon doono howlgalkan wadajirka ah oo ay fulin doonaan ciidamada wadamada safka hore, sida ay madaxdu horay ugu heshiiyeen.

Agaasimaha Waaxda Xariirka Dibadda iyo Hey’addaha Caalamiga ee Maamulka Gobolka Banaadir iyo Dowladda Hoose ee Xamar Mudane Maxamed Xasan ayaa kulan la qaatay Kuxigeenka Madaxa Hey’adda IOM ee Soomaaliya Marwo Ewa Naqvi.

Kulanka ayaa loogu hadlay Iskaashiga Hey’adda IOM iyo Dowladda hoose ee Xamar, ka shaqeynta Mashaariicda horu-marineed si shaqo abuur loogu sameeyo dhalinyarada Soomaaliyeed iyo dardargelinta Mashruuca xalka waara ee dib-u-dajinta loogu sameenayo barakacayaasha Muqdisho.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa tacsi u diray qoyska, qaraabada iyo guud ahaan ummadda Soomaaliyeed ee uu ka geeriyooday Alle ha u naxariistee Ra’iisul Wasaare Kuxigeenkii hore ee Dalka ahna Wasiirkii Hore ee Arrimaha Dibbedda Ismaaciil Maxamuud Hurre Buubaa.

Madaxweyne Xasan Sheekh ayaa tilmaamay in Ismaaciil Hurre Buubaa uu ahaa aqoon yahay iyo khabiir door weyn ka soo qaatay u adeeggidda qarankiisa, dib u dhiska dalka, xoojinta siyaasadda arrimaha dibbadda iyo dib u yagleelidda dowladnimada Soomaaliya, isaga oo xilal kala duwan ka soo qabtay Dowladihii Kumeel Gaarka ahaa ee soo maray dalkeenna.

Madaxweynaha Jamhuuriyadda Mudane Xasan Sheekh Maxamuud ayaa Alle uga baryey in Ismaaciil Hurre Buubaa uu hoygiisa ka yeelo jannatul fardowsa samir iyo iimaanna uu ka siiyo qoyskiisa, ehelkiisa iyo shacabka Soomaaliyeed ee uu ka baxay.

Wasiiru dowlaha Wasaaradda Deegaanka iyo isbeddelka Cimillada, Aadam Aw Xirsi iyo guddoomiyaha Hay’adda Maaraynta Musiibooyinka Qaranka ee SODMA Mudane; Maxamud Macallin ayaa shirka Arrimaha Bini’aadannimada kaga qeyb galay Magaalada Geneva ee dalka Switzerland.

Shirkan oo ay soo qaban qaabisay Qaramada midoobay ayay u jeeddadiisu ahayd sidii Soomaaliya loogu tabaruci lahaa, looguna aruurin lahaa deeq maaliyadeed si wax looga qabto arrimaha bini’aaddannimo iyo Barakacayaasha magaalada Baardheere ee uu saameeyay roobabka iyo colaadaha ka jira dalka.

Shirka ayaa waxaa ka qeyb galay waddamada deeqda bixiya sida Midowga Yurub, China , waddamada Carabta iyo hay’adaha aan dowliga ahayn iyo kuwa Qaramada Midoobay ee ka shaqeeya hawlaha bini’aaddannimada.