Halku-dhiggu waa Oraah ama kalmado loo adeegsado in Bulshada lagu dhiirigaliyo, lagu Rajo galiyo, Falalka Xun lagaga reebo ama Wax Wanaagsan inay Bulshadu qabato lagu Faro.
Halku-dhigga wacan waa matoorka dhaqaajiya bulshada balse waa inay xaqiiqada ku salleysan tahay taaban kartana Dareenka Bulshada taaso noqon karta Guubaabin lagu kicinayo Bulshada si ay ugu wada istaagaan Danta Guud.
Madaxweyne Xasan Sh/Maxamuud ahna Taliyaha Ciidanka Qalabka Sida, sida uu qeexayo Dastuurka ku meelgaarka ah ee dalka ayey halku-dhig u ahayd muddo xileedkiisii hore ee 2012 – 2017 oraahda ah “Xaaqinta iyo Dhulka, Xaaqinta ayaa dhammaaneysa oo Dhulku baaqi ayuu sii ahaanayaa!!!” isagoo ula jeeday Argagixisada Alshabaab iyo Daacish inay yihiin Xaaqin, Shacabka Soomaaliyeedna ay yihiin Dhul taas oo aysan suurtagal ahayn inay Xaaqintu Dhulka Dhammeyso.
Halku-Dhiggan wuxuu saldhig u ahaa Hawlgalkii ballaarnaa ee ahaa “HAWLGALKA BAD WEYNTA HINDIYA” taas oo lagaga si feeyay dalka qeybo badan oo ay markaas haysteen Argagixisadu ka dibna lagu yagleelay Dowlad Goboleedyadii loo madlanaa ee dhammeestirka u ahayd Faderaaleynta Dalku qaatay.
Hadda oo uu madaxweyne Xasan Sheekh Maxamuud uu helay fursad uu mar labaad ku hoggaamiyo dalka waxaa uu la yimid hal-ku-dhig tii hore ka mug weyn oo ah “SOOMAALI HESHIIS AH, DUNIDANA HESHIIS LA AH!!!” haddaba si ay Heshiisyada ku jira hal ku dhigga madaxweynaha uu la rabo dalka iyo dadkaba loo rumeeyo waxaa lagama maarmaan noqotay in la helo Xukuumad Dan-Qaran ka shaqeysa taas oo Soomaaliya u horseedi karta inay noqoto dal nabdoon si ay Bulshada Soomaaliyeed u helaan isku socod nabdoon, Cibaado aan Cabsi ku jirin iyo Ganacsi xor ah oo dalka gobolladiisa si nabad ah isaga kala gooshi kara.
Haddaba Xukuumadda oo ka dhabeynaysa ka shaqeynta Dan-Qaran waxey ka hawlgashay u rumeyta Riyada ay Bulshadu ku taameysay in mudddo ah waxeyna hal-ku-dhig ka dhigatay “GUUL ama GEERI” taas oo dhaqaajisay dareenka Ciidanka Xoogga Dalka iyo Bulshada Soomaaliyeed oo iska feyday Cabsidii humaagga ahayd ee ay Khawaariijtu ku haysey Bulshada Soomaaliyeed haddaba maanta ayey u muuqataa in la gaaray waqtigii uu Xaaqinku dhammaan lahaa sababta oo ah shalay shacabkii ay ku dhex dhuuman jireen ayaa maanta u sita Qoriga xagga ay inta kale na ay farmuuqayaan hadba meesha ay ku dhuuntaan haraadiga khawaariijta ee dalka iyo dadkaba la haray.
Maanta sida laga dheehan karo Kacdoonka Shacabka iyo Gulufka Ciidan ee garabsanaya saaxiibbadooda Caalamiga ah ayaa dhawaan ka taqalusi doona Khawaariijta Alshabaab iyagoo cagta marinaya fariisinnadooda waa weynaa ee ay gobollada ku lahaayeen.
Haddaba waxaan leeyahay Bulshada Soomaaliyeed “WAY JABEENEE, JABSHA!!!”
si dalkeenu u helo nabad waarta oo aan kula soo bixi karno Kheyraadkeenna dabiicaga ah oo aan Barwaaqo gaarno, inshalh.
Firxad Fulay ah oo Fal Wuxushnimo geysanaya nama Cabsi galin karo. GUUL ama GEERI
W/Q: HOOSOW
