Changsha, Shiinaha – 10ka Juun, 2025:- Wasiirka Arrimaha Dibadda iyo Iskaashiga Caalamiga ah ee Soomaaliya, Abdisalam Cabdi Cali (Dhaay), ayaa kulan muhiim ah la qaatay dhiggiisa Kenya, Wasiirka Arrimaha Dibadda iyo Qurbajoogta, Mudane Musalia Mudavadi, xilli uu socday Shirka heer-wasir ee Isuduweyaasha FOCAC, oo ka dhacay magaalada Changsha ee dalka Shiinaha.
Kulankan ayuu wazirku uga gol lahaa inuu ku adkeeyo in dhammaan wada-hadallada iyo iskaashiyada laba geesoodka iyo kuwa caalamiga ahba ay waajib tahay in lagu fuliyo oo keliya hay’adaha dastuuriga ah ee dalka. Wasiir Abdisalam ayaa si ku adkeeyey in la ixtiraamo madax-bannaanida, midnimada, iyo wadajirka dhuleed ee Soomaaliya, taasoo uu ku tilmaamay tiir-dhexaad u ah deris wanaagga iyo xasilloonida gobolka. Waxa uu uga digay dhammaan dhinacyada ku lug leh gobolka in la dhiirigaliyo kooxo aan sharciyad lahayn ama sheeganaya gooni u goosad, taas oo uu ku sheegay in ay dhaawac ku tahay kalsoonida iyo wada-shaqeynta gobolka.
Dhankiisa, Wasiir Mudavadi ayaa si cad u muujiyay in Kenya ay weligeed garab taagneyd midnimada iyo madax-bannaanida Soomaaliya, isla markaana ay sii wadi doonto taageeradaas iyadoo la jaanqaadaysa mabaa’diida deris wanaagga iyo wadajirka gobolka.
Labada wasiir waxay isla meel dhigeen in la dedejiyo kulanka Guddiga Iskaashiga Wadajirka ah (JCC), si loo dhammeystiro heshiisyadii is-afgarad ee hakadka galay, loogana shaqeeyo horumarinta iskaashiga labada dal ee dhinacyada ganacsiga, waxbarashada, kaabeyaasha dhaqaalaha, iyo arrimaha amniga.
Soomaaliya ayaa uga mahadcelisay Kenya kaalinta ay ka qaadato sugidda nabadda Soomaaliya, gaar ahaan doorka ay ku leedahay howlgalka ATMIS ee Midowga Afrika, oo muddo ka badan 25 sano ah Kenya ay qayb muhiim ah ka ahayd.
Kulankan ayaa loo arkay mid guul ah oo muujinaya isfaham, kalgacal derisnimo iyo rabitaan cusub oo lagu xoojinayo xiriirka qotoda dheer ee u dhexeeya labada dal ee dariska ah.
DHAMMAAD
->###<-
Waaxda Warbaahinta
Communications Department
#Somalia #Kenya #FOCAC #Changsha #China
