Dowladda Soomaaliya ayaa maanta si rasmi ah u xaqiijisay in Dowladda Itoobiya laga reebay Dowladdaha ka qayb qaadanaya hawlgalka Cusub ee Ciidanka Midowga Afrika oo Soomaaliya ka hawlgeli doona bilowga sannadka Cusub ee 2025-ka.
Wasiirka Wasaaradda gaashaandhiga Xukuummadda Federaalka Soomaaliya Mudane Cabdiqaadir Maxamed Nuur (Jaamac)oo la hadlay Warbaahinta Qaranka ayaa u xaqiijiyey in Itoobiya si rasmi ah looga reebay Dowladdaha ka qayb qaadanaya hawlgalka Midowga Afrika ee 2025, wasiirka ayaa sheegay in Itoobiya ku xad gudubtay qarannimada Soomaaliya sidaas darteed na Dowladda Soomaaliya uga reebtay hawlgalka midowga Afrika ee Soomaaliya,Wasiir Cabdiqaadir ayaa dhanka kale sheegay in dhowaan la shaacin doono liiska dalalka qaybta ka noqon doono hawlgalka Cusub.
Hawlgalkan cusub ee Midowga Afrika ayaa ah mid kooban oo dhanka farsamada ka caawin doona Ciidanka Xoogga Soomaaliyeed hawlgalada la dagaalanka Khawaarijta,dowladda Soomaaliya ayaa bisha December soo afmeeri doonta hawlgalkii hore ee ATMIS waxana goobihii Ciidanka ATMIS ka hawlgeli jireen la wareegaya Ciidanka Xoogga dalka Soomaaliyeed.
