Shumiska waa ficillada ay makhluuqa uu Alle abuuray ku muujiyaan Naxariista, Marxabeynta, Kalgaceelka, ama Jaceelka ay u qabaan qofka ama makhluuqa ama shay.
Haddaba qormadan waxaan ku dul istaagey shumiskii ugu Narariista badnaa, uguna qiimaha badnaa Qarnigan taas oo uu Alle ku tusaaleynayay Gaalada isku haysta inay u doodaan xuquuqda Aadamaha iyo Xayawaannada oo ka dhacday Masjid ku yaal Algeria.
Masjidkan oo ku yaal dalka Aljeeriya oo lagu oogayay Salaadda Taraawiixda uuna tujinayay Imaam Sheekh Walid Mehsas oo aad ugu khushuucsan Aayadaha Quraanka ee uu akhrinayay ayey Bisad ku soo booday, isagoon argagixin muujinaya taxadar iyo naxariis kana kaalmeynaya waxey rabtay oo ahayd inay oogadiisa fuusho oo salaaxaya ayuu sii watay Qur’aan akhriskiisii iyo gudashada Salaadda uu ku jiray.
Bisaddii ayaa oogadiisii fuushay oo hadba dhinac u jeedjeedsatay iyada oo fiirinaysa dadkii Salaadda tukanaayay una riyaaqeysa Kalaamka Alle iyo Codka macaan ee uu ku akhrinayay Imaam Sheekh Walid Mehsas ka dibna SHUMIS kac ku siisay imaamka taas oo u muuqatay inay ka falcelinayso uma mahadcelinayso naxariista uu u muujiyay iyo sida qurxoon ee uu u akhrinayay Qar’aanka Kariimka ah.
Arrintan ayaa guud ahaan qabsatay Warbaahinnada kala Caalamka iyo Baraha Bulshada oo siyaabo kala duwan looga falceliyay ama looga hadlay loogana qoray maqaallo kala duwan oo si togan u tusaaleynaya Diinta iyo Dhaqanka Saxda ah ee Shaqsiga Muslimka ah taas oo ku baraarujisay Quluubtii gaalada ee jiifay inay Diinta Islaamku ay tahay Diin Nariis iyo Nabadgalyo ku dhisan una tudha Dad iyo Duunyo.
Dhinaca kale Imaam Sheekh Walid Mehsas ayaa maalmahan ka cabanayay in ay dadyow kala duwan magaciisii ku sameysteen Ciwaanno iyagoo ka faa’ideysanaya Caannimadiisa degdegga ah iyo inay ku helaan taageero badan oo soo raacda Barahooda Bulshada. Imaamka ayaa sheegay inuusan lahayn wax Ciwaan ah uu dacwo ka yahay dadka adeegsanaya magaciisa iyo sawirkiisa isagoona tilmaamay inuu Alle ku daayay ama uu Alle ku dacweenayo.
Waxaa aad nasiib darro ah in qof muslim ah oo taqi ah inuu adeegsado magaciisa iyo sawirkiisa nin adduun ay qaadatay oo ciwaankiisa aysan ka muuqan wax ka turjumayo imaamka.
Haddaba qormadeenan waxaan ku soo gabagabeenaynaa inaan ku baraarugtid inaad tahay qof diran oo loo xilsaaray muujinta wajiga qurxoon ee islaamka oo aad ka fogaatid wax kasta oo lid ku ah Muslimnimada oo dhaawac u keeni kara Diinteena Naraxiista iyo Nabadgalyada ku dhisan oo aad ku dadaashid inaad noqotid kii ugu yeeri lahaa dadka Diinta Islaamka ka qatan oo ka shaqeyn lahaa badbaadadooda iyo inaad ka fogaatid wax kasta oo Been Abuur ah.
WQ: ABU CIMAADDUDIIN
