Sadaqadu waa wax Allaah (Swt) uuna faray in loogu gargaaro dadkeena tabaaleysan ee dan yarta ah, dadka kiisa ladanna uu caawiyo kiisa miskiinka ah.
Bisha Ramadaan waa bisha ugu kheyrka badan ee dadka masaakiinta ah caawinadu gaarto.
In la iscaawiyo waa sheey wanaagsan, laakiin dadka sadaqada gaarsiinaya maskiinta intooda badan waxa ay horey u wataan Kaamero iyo dad muuqaallo u duubo oo marka ay sadaqada bixinayaan sawir uga qaada miskiinka ay sadaqadu gaartey.
Marka la duubayo qof ama la sawirayo sida caadiga ah waxaa habboon haddii uusan u diyaarsaneyn qofka ama raali ka aheyn waa inaad oggolaansho ka heshaa.
Dhallinyarada ama Hay’adaha qaar ee masaakiinta caawiyo ma ka taxaddaraan ilaalinta xuquuqda sawirka ee maskiinka baahan, miskiinkuna waxa keliya ee uu u jeedo waa deeqdaas yar ee loo taagayo, laakiin haddii la weydiin lahaa waxaa suurta gala in uusan raali ka eheyn in la sawirto eey dantu ku qasbeyso, xaqna maaha in qofka dantiisa looga faa’iideysto.
Laba hab waad u isticmaali kartaa sawirka qofka baahan adigoo oggolaansho ka helaya, inaad dadka hantida leh wax uga soo qaado iyo in aad qof sadaqo u soo dhiibay aad cadeyn uga dhigto.
Haddaba, waa wax aan wanaagsaneyn in aad sawir kaga qaadato adigoo hadafkaagu yahay kaliya dadku ineey ku arkaan inaad sadaqo bixisay.
Caawinta kuma xirna sawir in laga qaato la caawiyaha, Sadaqaduna sawir maha ee waa waxa aad baxsaneeyso.
W/Q: Xuseen Xasan Rooble Shadoor
