Ra’iisul Wasaare Ku Xigeenka Xukuumadda Federaalka Soomaaliya, Mudane Saalax Axmed Jaamac, ayaa maanta kormeer shaqo kuyimid Wasaaradda Warfaafinta Dhaqanka Iyo Dalxiiska Soomaaliya, si uu ugu kuurgalo hawlaha baaxadda leh ee wasaaraddu u hayso Shacabka Soomaaliyeed.
Ra’iisul wasara ku-xigeeka waxaa xarunta wasaaradda kusoo dhaweeyay wasiirka wasaaradda Warfaafinta mudane Da’uud Aweys Jaamac, iyo Mas’uuliyiinta kale ee wasaaradda, kuwaas oo uga war bixiyey adeegyada muhiimka ah ee ay bulshada u fidiyaan, gaar ahaan wacyi galinta bulshada iyo kaalinta wasaaradda ee la dagaalanka khawaarijta ee ka socda dalka.
Mudane Saalax Axmed Jaamac ayaa bogaadiyey doorka muuqda ee Wasaaradda Warfaafinta, Dhaqanka iyo Dalxiiska XFS ay ugu jirto dowlad dhiska casriga ah isagoo ku adkeeyay madaxda Wasaaradda muhiimadda ay u leedahay in qorshayaasha wasaaradda lagu waafajiyo Qorshaha Isbeddelka Qaran (NTP).
Ra’iisul Wasaare Ku Xigeenka XFS Mudane Saalax Axmed Jaamac, ayaa mid mid u booday Warbaahinta Qaranka qeybaheeda kala duwan sida Wakaaladda Wararka Qaranka Soomaaliyeed ee SONNA, Radio Muqdisho , Wargeyska Dalka iyo SNTV, isagoo shaqaalaha ku ammaanay doorka wanaagsan ee ay kaga jiraan horumarinta dowlad wanaagga iyo isku xirka dowladda iyo Bulshada Soomaaliyeed.
Ugu dambeyntii, Mudane Saalax Axmed Jaamac ayaa ku boorriyey mas’uuliyiinta iyo shaqaalaha Wasaaradda in ay sii xoojiyaan dadaalladooda, si loo xaqiijiyo himilooyinka Qorshaha Isbeddelka Qaran, loona gaaro horumar waara oo ay ka faa’iidaystaan dhammaan shacabka Soomaaliyeed.
