Nootaayo waa Xafiis u xilsaaran qabashada adeegyada Sharciga ah. Waxaa furitaankiisa u xilsaaran Wasaarada Cadaalada, Arrimaha Diinta iyo dhaqancelinta ayada oo raacaysa Xeerka Nootaayada LR 1 ee soo baxay 2014. Waa xafiis u madax banana gudashada awoodaha xeerka nootaayada uu siiyay laakin Sarkaalka haya nootaayada waxa uu matalaa wasaaradda Cadaaladda.
Maxay yihiin adeegyada sharci ee ay qabato nootaayada?
1. kala wareejinta Hantida Guurtada ah iyo Maguurtada
2. Sharciyeynta Wakaaladaha
3. Samaynta iyo sugidda cadaymaha sharciga ah.
4. Samaynta iyo sugidda heshiisyada sharciga waafaqsan.
5. Samaynta iyo sugidda dardaaranadda.
6. Samaynta iyo sugidda lahaanshaha,isla lahaanshaha iyo dhammaan hawlaha kale ee xeerku baneeyay
Maxaa ka reeban sarkaalka nootaayada
Waxaa ka reeban Sarkaalka Nootaayaha:-
1. Sarkaalka Nootaayaha waxaa ka reeban in uu bixiyo Sir la xidhiidha qoraalada (Documenti) lagu aaminay in uu xafido.
2. Sarkaalka Nootaayuhu ma kala wareejin karo Hanti aan waddan caddaynta Lahaanshaha ku qeexan sida Xeerarka Dalka ku tilmaaman.
3. Sarkaalka Nootaayuhu ma samayn karo caddayn lahaansho ee Maxkamaduhu u xil saaran yihiin.
4. Sarkaalka Nootaayuhu ma diiwan galin karo qoraalo aanay u dhamayn dhinacyada ay khusayso.
5. Sarkaalka Nootaayadu ma diiwan galin karo qoraalada khuseeya Naftiisa, Aabihii, Caruurtiisa, Walaaladiisa iyo Xaaskiisa (Ooridiisa) xataa hadday is fureen
6. Sarkaalka Nootaayuhu kuma furan karo ruqsada Nootaayada laba Xafiis.
7. Sarkaalka Nootaayuhu uma banaana in uu Xafiiska Nootaayaha la wadaajiyo cid kale sida Meherad Ganacsi, Xafiis Qareen, NGO, IWM.
8. Sarkaalka Nootaayada waxaa ka reeban Hibaynta Hantida Guurtada iyo Ma Guurtada ah
9. Sarkaalka Nootaayada waxa ka reeban in uu ka been sheego ama Qariyo qiimaha hantida uu kala wareejinayo.
10. Sarkaalka Nootaayada waxaa ka reeban inuu noqdo shaqaale Dowladeed.
Mahadsanidiin.
11. Sarkaalka Nootaayada waxaa ka reeban inuu noqdo Ganacsade.
WAAYIDDA RUKHSADDA NOOTAAYAHA
Nootaayaha wuxuu ku weyn karaa Rukhsaddiisa.
1- haddii uu geeriyoodo.
2- Hadii uu gudan waayo shaqadiisa Nootaayanimo caafimaad darro xagga maanka iyo jirka ah;
3- Hadii uu ka tanaasulo mihnaddiisa Nootaayanimo
4- Hadii uu qabto xil kale hay’adaha Dawladda ama hay’adaha gaarka loo leeyahay.
5- Hadii uu gaaro da’da hawl-gabka 70 sano.
6- Hadii lagala noqdo Rukhsadda Nootaayada Anshax xumo baahsan awgeed.
7- Haddii daciifnimada xagga maskaxda kaliya ay noqoto waqti kooban, Nootaayaha wuxuu ahaan karaa mid hawlihiisa ka fadhiista waqti xaddidan oo aan ka badneyn hal sano haddii ay hal sano ka badnaato daciifnimada xagga maskaxda waa laga joojinayaa shaqada.
8- Haddii uu ka joogsado sabab la’aan shaqada Nootaayada 2 (labo) bilood wax ka badan goobtiisa.
WQ: C/salaam M. Yaasiin
