qof kasta wuxuu leeyahay meel uu ku jiheysan iyo qorshe uu ku taamayo oo haddii qofku yahay mid qorshe la’aan ah wuxuu noqdaa mid gebi dhacleeya oo aan jiho toosan laheyn.
jiheynta nolosha waxay ku timaadaa qorshe iyo yool qofku leeyahay oo u cabbiran uuna isku dayayo in uu gaaro taas macnaheedu ma aha in qofka haddii uu gaari waayo yoolkii uu lahaa in uu qalbi jabo.
ogow guul keliya lama filan karo oo waxaa daba socota guul darro iyo mararka qaar caqabado kaa hor istaagi kara in aad gaarto yoonkaadii.
waxaa la yiraahdaa “meeshii rajo jirto ,waddo ayaa jirta “ oo ah haddii aad adigu han leedahay mar walba waxaad heleysaa albaab kuu furma oo aad ku socon karto laakiin rajo la’aan in aad meel la fariisato oo is hiifto waxba ma soo kordhin karto.
culuunta saykolojigu waxay qabtaa in rajo xumada ay ka dhalato welwelka kaas oo si fudud u burburin kara han kasta oo qofku lahaa.
waxaa la yiraahdaa welwelku wuxuu qofka u cunaa sida aboorka iyadoo aboorkaas yare e aan tamarta weyn laheyn dumin karo geed baxayey in ka badan 200 sano markaa ma aha in nolosha uu soo gabagabeeyo welwelka astaanta rajo beelka ah.
nolosha waxay leedahay dariiqyo badan oo midka kugu adkaada aad mid kale uga leexan karto waxaana loola jeedaa in qofku karti u yeesho caqabadaha soo wajahaya oo qaarkood noloshiisa xididada u siibi karaan.
nolosha ka fiiri kuwa kaa liita ee ha ka fiirin kuwa kaa tunka roon tusaale ahaan adiga waxaad leedahay itaalkaagii iyo lixdaada lixaad oo kuu dhan laakin bal ka warran curyaanka baaskiilka lagu riixo ee subax walba kaa soo horbaxa adigoo shaqadaada u ordaya hadana laga yaabo in uu kaa farxadda badan yahay.
dib ma u eegtaa kuwa dariiqyada daadsan ee aan maalintaa heli karin xabbad rooti iyo koob shaah halka laga yaabo in aad adigu ka soo quraacatay ama ka qadeysay maqaayadda ugu shidan magaalada hadana laga yaabo in aad adigu weli nolosha ka cabaneyso.
ku jihee noloshaada dhinaca farxadda oo is bar in aad dhoolacadeyso una dhoollacaddeyso oo soo dhaweyso kuwa kaa liita .
noloshaada ku dhis in aad mar walba sameysato qorshe nololeed aan ka badbadis aheyn macnaha in waxa aad heli karto isku filleysiiso oo aadan ka dayrin xaaladaada dhabta.
noloshu kuma dhisna cabasho aad ka cabato xaaladda aad ku jirto taas waxaad ka heleysaa oo keliya in lagugu wiirsado oo gadaashaada ay ka yimaadaan hadalo aadan jecleysan doonin oo ku han jabinaya.
hiigso hankaaga oo marna ha ka lumin wadada aad jeexatay kuna dhiirro in aad ka dhabeyso hiigsigaada iyo waxa aad dooneyso in aad gaarto tusaale ahaan haddii aad hiigsaneyso in aad ka jibba keento waxbarashadaada yaaney kaa hanjabin hnqaltaagga dahallinayro laga yaabo in aad saaxiibo tihiin oo tagay qurbaha oo kula soo wadaagaya sawiro ay ku galeen meelo qurxoon oo ka mid ah dalalka ay tageen.
ogow wax kasta oo dhalaala dahab maaha waxaa laga yaabaa dhallintaa nolosha ay kuu sawirayaan in aaney ku jirin iyagu oo ay dhalanteed tahay adigana lagaaga weecinayo hammiggaada.
si kasta ha ahaatee noloshaada ku astee jihadii aad u qorsheysay raacna wadadadii dahabiga aheyd ee aad u sameysay.
WQ: Mohamed Shiil
