Diinteena suubban ee Xaniifka ah waxey jideysay oo xurmeysay in si gaar ah loogu naxariisto dadka nugul oo isugu jira Caruurta, Haweenka, Waayeelka, dadka Baahiyaha gaarka ah qaba kuwaas oo ay Soomaalidu u taqaan Bib-Ma-geydo.
Faalladan waxaan ku dul istaagi doonaa agaasimihii u qaabilsanaa dadka baahiyaha gaarka qaba ee Gobolka Banaadir kaas oo Khawaariijta si Arxan daran ay ugu toogteen xafiiskiisa isagoo garan la’ meel uu u cararo iyo cid uu ciirsado.
Allaha unaxariisto Agaasimihii Waaxda Naafada Gobalka Banadir Axmed Xasan Warsame Jimcaale oo ka mid ahaa 5-tii qof ee koox ka tirsan khawaarijta alshabab ay ku dileen weerarkii Bahalnimada ahaa ee ay ku soo qaadeen Xarunta Gobolka Banaadir ee loogu adeegaayo bulshada.
Tixdan waxay ku saabsan tahay Allaha u naxariisto Marxuum Axmed Xasan Warsame oo ahaa muwaadin aragga la’
Waxaa tiriyey oo alifay Ag. Liibaan Cabdi Cali
Illaahow anoon eegin bay ila heleen shiishka
Itaal uma lahayn in aan arkoon aayar uga dhuunto
Mana helin qof iga caawiyoo meesha iga saara
Ummaddii markay kala ordeen goobta ila joogtay
Qol yaroon ku soo oodmay bay igu heleen duulku
Aqoon iima laha mana aqaan waxay ahaayeene
Ashahaadka anigoo hayoo aan dhan uga leexan
Ayuun bay rasaas i huwiyeen koox ayaan darane
Adduunka iyo aakhiro adaa uumay oo wada e
Addoommahana adigaa lahoo guda abaalkoode
Allow iiga aar kuwii i dilay una itaal sheego.
Kooxda khawaarijta al shabab ayaa baneystay oo caadeystay daadinta dhiigga iyo dilka dadka Musliinta ah ee Soomaaliyeed ee aan waxbo galabsan.
Khawaarijta ma kala soocaan dadka ay dilayaan, qof kasta oo Soomaaliyeed ayaa dil ugu xukuman, waxay dilaan Shacab, Dowlad, Aqoonyahan, Nabaddoono, Culimo, Dhaqtar, Dadka birimigeedada ah sida Caruurta yaryar, Haweenka, Maatida, iyo Dadka Naafada iyagoon kala soocin.
15 sano ayey xasuuq iyo qaraxyo wadeen kooxda argigixisada ee al shabab taas oo ay ku gumaadaan Umadda Soomaaliyeed waxaana ka mid kuwooda ugu waa weyn Qarixii Soobe1, Soobe2, Hotel Shaamoow, Hargaha iyo Saamaha, Tiyaatirka Qaranka iyo qaraxyo kale oo waaweyn, taas oo lagu xasuuqay, laguna gumaaday umadda Soomaaliyeed oo isugu jira Bulshada noocyadeeda kala duwan, markasta waxaa rajo beel iyo quus ay ku ridaan dad faraxsanaa ayaa noqda Agoomo, Rajay, iyo khasaaro hantiyadeed, laakiin nama niyad jabineyso oo waa ka soo kabsanaa dhagaraha iyo dabinka cadoowgu ma leego mar kasta taas oo uu ka rabo niyad jab iyo quus in uu ku abuuro bulshada Soomaaliyeed kadibna isku dhiibaan balse ma dhacin.
Baddalkeedii waxaa dhacay in Soomaalidii Geesinimada lagu yaqaanay inay ku baraarugeen oo ay go’aansadeen inay iska dhiciyaa taaso sababtay inay godkey galaanba looga daba galo illeen “Qaniinyo, Qaniinyo ayaa kaa fujisa!” waana tan keentay in iyagoo naf la caari ah ay u meel dayi waayaan weerarkoodii wuxushnimo balse waxaa hubaal ah in sida ugu dhaqsaha badan dalka gabi’ahaanba looga xoreyn doono, inshalh.
Haddaba gabagabda Qormadan waxaan ugu bishaareenayaa inay Dowladda iyo Bulshada Baraarugtay oo iskaashanaya ay u aargudi doono dhammaan dadkii sida xaq-darrada ah loo xasuuqayay 15 sano ee la soo dhaafay.
Madaxweyne go’aan leh, xukuumad u damqanaysa bulshadeeda iyo Kacdoonka shacabka oo isbiirsaday waa kan guusha inoo horseedi doono, illaahay idankiis.
Innaa lilaah waa inaa ileehi raajicuun
Waxaan Alle uga baryayaa inuu jannadiisa ka Waraabiyo isaga iyo intii kale ee weerarkaas ku geeriyootay sidoo kalena inta dhaawaca ahna uu Alle ha u booga dhayo.
WargeysKa Dalka Editorial
