Madaxweynaha Jamhuuriyadda Federaalka Soomaaliya mudane Xasan Sheekh Maxamuud oo khudbad dhinacya badan taabaneyso xalay jeediyay ayaa ugu horeyn kaga hadlay qaraxii 14-October -2017 ee khawaarijtu ku xasuuqday dad badan oo shacab ah, asigoo Alle uga baryay in Shuhadadaas naxariistiisa ugu deeqo.
Madaxweyne Xasan sheikh ayaa ka hadlay dagaalka ka dhanka ah khawaarijta wuxuuna farriin u diray ciidamada xoogga dalka iyo xoogagga Macawiisleyda, una sameeyey balan-qaadyo kala duwan.
Madaxweynaha ayaa sidoo kale Alle uga baryey ciidamada dagaalka ku jira inuu abaal-kooda u gudo naf hurnimada ay sameeynayaan iyo jihaadka ay ku jiraana uu ka aqbalo, sidoo kale wuxuu ku sii dhiirigeliyey inay ka dhabeeyaan riyada dadka Soomaaliyeed ee ku taamaya oo in dalka laga wada xoreeyo khawaarijta.
“Geesiyaal waxaad iftiin u tihiin xorriyadda dadka Soomaaliyeed ee aad ka dhalateen, waxay gura doonaan miraha nabadda ee maanta aad dhiigiina ku tacbeysaan, waxaan idinkual dardaarmayaa ‘waa la idinku seexdaaye ha seexanina,” ayuu yiri Madaxweyne Xasan Sheekh.
Madaxweynaha ayaa ciidamada ka balan-qaaday inuu kula noolaa doono furimaha jihaadka, “Waxaan idinla qeybsa doonaan xanuunka iyo farxadda guusha aad ka gaartaan jihaadka,” ayuu yiri.
Madaxweyne Xasan Sheekha ayaa ciidamada xoogga dalka iyo kuwa degaanka ka balan qaaday inay soo daba fariisi doono dhamaan dadka Soomaaliyeed, si dagaalka ay hiilo ugu helaan.
“Geesiyaal waxaan idinka balan-qaadayaa in dhamaan umadda Soomaaliyeed aan idin soo daba fariisiyo, si ay idinkugu noqdaan garab iyo wehel aad dugsataan,” ayuu markale yiri Madaxweyne Xasan Sheek
Madaxeyne Xasan Sheekh ayaa sidoo kale u mahadceliaya Culimada Soomaaliyeed doorka ay ka qateen dagaalka lagula jiro khawaarijta iyo u caddeynta Bulshada in dagaalka lagula jira khawaarijta uu yahay Jihaad qof walbana waajib kuyahay in uu ka qeyb qaato, si khawaarijta looga bad-baadiyo ummadda Soomaaliyeed
Madaxweynaha ayaa ciidamada ka balan-qaaday inay dowladooda ka heli doonaan maamuus kasta oo ay xaq ugu leeyihiin, sida dalacsiin, bilado iyo abaal-marino kale oo halganka khawaarijta dalka looga sifeynayo ay ku muteysan karaan.
ugu dambeyn Madaxweynaha Xasan Sheekh waxa uu guud ahaan Shacabka Soomaaliyeed ugu baaqay in loo midoobo dagaalka ka dhanka ah khawaarijta, waxa kalana meel la iska dhigaan si dadka soomaaliyeed looga dul-qaado cadowga muddada dheer dhibaatada ku hayay.
