Nabaddu waa shayga ugu horreeya ee noole kasta uu tabaya, una baahan yahay waqti kasta, nabad haddii la waayana jiritaanka ummadeed ayaa sii lumayo, ama ugu yaraan halis ayuu gelayaa.
Aadanaha nabad wax uu ku dhaamo waa la waayay, dadka sida ay u kala nabadgelyo fiican yihiin ayay u kala hormarsan yihiin, nabaddu waqa xasilooni, nabaddu waa midda horumarka iyo kobaca dadka u horseedda, nabaddu waa midda looga badbaado nolosha darxumada.
Nabad haddii ay jirto waxaa la helayaa isjacayl, isa saamixid, nabad haddii la helo waa la gaaraa barwaaqo, nabaddu waxaa ka dhasho midnimo, ilbaxnimo, nabaddu waa iftiin, nabaddu waa farxad waarta.
Nabad haddii la waayo waxaa booskeeda dego wal wal iyo walbahaar, waxaa beddelo silac iyo saxariir, waxaa dadka ku dhaca qarbud iyo qarribaad, nabad ayaa naas la nuugo leh, nabadda ayaana mudan in loo hiiliyo lana garab istaago, lagana shaqeeyo.
Nabadda oo laga shaqeeyo waa waajib ina wada saaran, qof kasta iyo doorka uu ka gaysan karo, colaadda iyo xasillooni darrada oo lala dagaallamana waa arrin nalaga wada doonayo, axad walba iyo karaankiisa, adiga oo nabad heli karana belo lama saadaalsado, loomana yeerto, loomana tafaxayto,
Nabadda waxaa ka soo horjeedo colaad, khilaaf, dagaal, burbur, nabadda haddii la waayo waxaa la waynayaa nolosha, ama ugu yaraan waxaa la gelayaa nolol aad u liidata, nabad la’aan waxa ay keentaa dowlad la’aan, dowlad la’aantana waxaa ka dhasha kala danbayn la’aan.
Nabad la’aantu waxa ay horseedda burbur dhan walba ah, amnigii ayaa burburaya, dhaqaalihii ayaa burburaya, waxbarashadii ayaa dhantaalmaysa, caafimaadkii ayaa la waynayaa, ganacsiyadii ayaa baaba’aya, qiimihii la lahaa oo idil ayaa khadka ka baxaya, qiyamkii ayaa hoos u dhacaya, nabad haddii la waayo waxaa badanaya tuugada iyo moorayaanta, waxaa badanaya dhaca iyo dilka, waxaa badanaya boobka iyo bililaqada.
Dad aan nabad haysan waxa ay u badantahay in ay nolosha ka dhacaan, waxa ay u dhowyihiin in ay yaraadaan, waxaa dhici karta in ay gumaysi galaan, dadku haddii ay nabadda ka baaba’do waxa ay noqonayaan kuwo qax iyo rafaad gala, kuwo silac iyo saxariir ku noolaada, kuwo sidii dugaaggii iscuna, dhiigga dadka aan wax galabsan ayaa rakhiis noqonaya, dilka dadka aan dambiga galin ayaa wax caadi ah iska noqonaya, dulmiga iyo gardarrada in la isku garab istaago ayay noqonaysaa.
WQ: C/salaam Maxamed Yaasiin
