Duqeynta Israa’iil ee Marinka Gaza ayaa gashay maalintii toddobaad oo isku xigta, iyada oo duqeyn xagga cirka ah saacadihii hore ee Axadda lagu dilay ugu yaraan afar Falastiiniyiin ah, laguna dhaawacay tobanaan kale, halka sidoo kale dhulka lala simay ugu yaraan laba dhisme oo dad ay deganaayeen.
Guriga madaxa Gaza ee Hamas, Yehya al-Sinwar, ayaa sidoo kale la bartilmaameedsaday, sida laga soo xigtay TV-ga kooxda.
Magaalada Tel Aviv ee Israa’iil, dadku waxay gambaad ka dhigteen dhismooyinka waa weyn, iyadoo dadka loo digay si aan waxyeelo uga soo gaareen Hubka culus ee Bambooyinka ay ku jiraan.
Rabshadaha cusub ee u dhaxeeya Israa’iil iyo Falastiiniyiinta ayaa salka ku haya cabashooyin muddo dheer soo taagnaa oo labada dhinac u dhaxeeya xaal waarana aan loo helin ayaa markale colaad horleh hurisay.
Dagaalyahanada Xamaas ayaa tiro gantaallo ah ku riday magaalooyinka Israa’iil, waxaana ku dhintay weerarkaas nin ku sugnaa deegaan dhaca bariga magaalada Tel Aviv.
Meelo badan oo ka mid ah dunida, waxaa ka socda banaanbaxyo looga soo horjeedo duqeymaha ka socda dhulka Falastiin,waxaana dadkan ka mid ahaa muslimiin badan oo ku nool dalka Britain.
Banaanbaxayaasha ayaa socod ku tagay fagaaraha kasoo horjeeda safaaradda ay Israel ku leedahay magaalada London.
