Cadowga ugu daran adduunyada waa cudur waayo cudurku wuxuu sababaa caafimaad Darro, caafimaad daarana badanaa waxaay ka timaadaa nadaafad darro taasoo bulshadeenu inta badan aysan ku baraarugsaneyn haatan.
Waxaa la yiraahdaa wasaqda iyo qashinka inta ay kuu jiraan ayuu cudurkuna kuu jiraa, macnaha qashinku wuxuu dhaliyaa caafimaad darro marka dadku waa inay ka fogaadaan meelaha qashin qubka.
Nadaafadda waxaa lagu tilmaamaa inay tahay imaanka barkiisa, waxaadna arkeysaa markaad nadiif tahay waxaad isku qabtaa kalsooni badan sidoo kale marka gurigaa iyo deegaankaadu nadiif yahay waad ku farxeysaa.
Dabcan meel walba oo bulsho ku nooshay waxaa ka dhalanaya khashin aad u fara badan khasinkaas wuxuu u baahan yahay maareyn iyo agaasin gaar ah oo loogu sameeynayo meelo khasinka lagu shubo isla markaana ay jiraan gawaari ka sii qaadda meeshaas iyagoo geynayaa meel ka fog magaalada isla markaana lagu gubo halkaas iyadoo loo yeelayo shaqaale u gaar ah.
Dal walba dalka uu ka nadiifsan yahay isha caalamka way qabaneysaa oo way arkeysaa, xitaa degmadaadu haddey tahay degmo nadaafaddeedu sarreyso waa la amaanayaa wallaahi waa degmo aad u nadiif oo qurux badan baa la leeyahay.
Haddaba, guri walba iyo goob gasta oo ganacsi waxaa ku waajib ah inay khashinka iska fogeeyaan iyagoo aan muslimka kalena ku dhibeynin waxa ay iyaga iska soo fogeeyeen.
Wasaqda waxay marriin u tahay cudurrada kala duwan gaar ahaan cuncunka jirka ku dhaca oo kale.
Qof ahaan samee wixii kaaga aaddan nadaafadda deegaankaada jirkaada iyo gurigaaga intaas qof waliba haddii laga helo deegaanka oo dhan baa nadiif noqonaya.
Dowladda dhankeeda waxaa looga baahan yahay in deegaan walba ay u qorto dad u qaabilsan shaqadaas oo mushaari ah, lagulana xisaabtamo nadaafadda degmada.
Shaqaalaha noocaan ah way jiri jireen waagii hore oo waxaa la oran jiray isbisiini oo waayadaan dambe dadka ay u yaqaanaan malaamilleey sidoo kale waxaa jiray wax loo yaqaannay khasin qubka oo ahayd meel dhowrsan oo xiran halkaasoo guri walba iyo mehradkasta ay ku shubi jirtay khasinkeeda.
Dhanka kale, xilliyada roobka waxaa jira meelo biyo fadhiisi ah biyahaas oo muddo ka dib isu beddela wasaq ay ka dhashaan cudurrada waayo caruurtu way iska dhex gelayaan oo dhex dabaalanayaan ka dibna way ku xanuunsanayaan biyahaasna hadda in laga fikiro oo wax laga qabto ayay ku habboon tahay.
Sidoo kalena bulaacadaha iyo musqulaha dadka qaarkiis ay ku soo deeyaan xaafaddaha qaar waa in wax laga qabtaa oo lagula xisaabtamaa
Shacab iyo dowladba waxaa nagu waajib ah in aan ku dadaalno nadaafadda dalkeenna iyo bilic soo celitiisa.
WQ: Osman Dhiblaawe
