Qalabkan (Social Media ) loo yaqaano waa mid dardar ku socda isla markaana leh saamyn xoog leh oo dhinca xiriirka bulshada isla markaana bedelay qaabkii hore ee dadku u wada xiriiri jireen.
Wuxuu qalabkani ka dhigay caalamka mid aan laheyn xuduudo taas oo la macno ah in qofka maanta aanay jirin wax xuduud ah oo ka horjoogsaneysa in uu la xiriiro caalamka meel uu joogaba Waxaa kale oo baraha bulshada ay fududeeyeen in hal meel ay ku wada hadli karaan dad fara badan oo kala jooga meelo kala duwan oo caalamka ah ayma isku dhaafsan karaan afkaarta iyo akhbaaraha.
Tusaale ahaan Twitter-Space waxaa lagu wadaagaa afkaaraha iyo fikradaha arrin markaa u muuqata mid taagan ama xasaasi ah waxana lagu dhisi karaa fikir markaa la karkarinayo si looga dhigo fikir siyaasadeed oo shaqeyn kara.
Waxaa lagu ogaan karaa fikirka arrin laga qabo waxaana lagu sameyn karaa sahan fikir la baarayo si loo ogaado waxa laga qabo.
Baraha bulshada waxaa sidoo kale looga faa’ideysan karaa dhanka xogaha oo lagu soo bandhigo siiba kuwooda markaa soo baxaya oo laga sii dheehan karo lagana raaci karo si war buuxa loo sameeyo oo la daba dhigo wareysiyo lagu faahfaahinayo.
Dhanka kale waxay abuureen arrimo aan hore loo ogeyn oo baraha bulshada qaarkood sida Facebook, Tiktok iyo kuwo kale waxay abuureen qabatin oo dhallinyarada haba ugu badnaadeene maanta si aad ah ayey maskax ahaan u saameeyeen waxayna qaarkood ka mashquuliyeen waxbarashadii iyo shaqooyinkii .
Waalidiinta qaarkood ayaa maanta ku dhibaateysan in ay carruurtooda ka celiyaan baraha bulshada ka dib markii ay arkeen carruurtooda oo ku dheggan telefoonadooda si ay qalabkaa baraha bulshada ula socdaan.
Xitaa gooobihii waxbarashada dhibaatada baraha bulshada waa laga dareemayaa oo xitaa macalinkii oo sabuuradda taagan oo wax sharraxaya ayaa ardaydu isaga jiraan facebook iyi Tiktok iyagoon waxba kala socon waxa macallinkaasi u sharraxayo.
Hooyiinka ayaa Iyana guryaha waxay qaati ka taagan yihiin in ay gabdhahooda ka celiyaan isticmaalka joogtada noqday ee baraha bulshada inkastoo hooyooyinka qaarkood ee la qabay loo furay isticmaalka baraha bulshada dartood.
Intaasi kuma koobna ee baraha bulshada saameyntoodaa bulshada waxaa ka mid ah waxay faafiyaan warar been ah oo qaarkood ku talo gal yihiin qaar kalena marin habaabin loogu talo galay .
Sidoo kale waxaa ku badan isku dirka, xanta iyo warar lagu raadinayo (views) oo laga rabo oo keliya aragtida in dhibco lagu helo .
Kicinta ayaasidoo kale loo isticmaalaa waxaana adeegsada kooxo afkaaro gaar ah wata oo kaga faa’ideysta in ay dadka ku saameeyaan.
Waana meelaha ay bulshada kaga imaan karaan marka ay adeegsadaan kooxha leh danaha gaarka ah ee diimeed iyo ujeedo xukun raadis ah.
Waxay baraha bulshada qeybaha ay ku jiraan qeybaha wada sheekeysiga la isugu gudbiyaan sheekooyin iyo xiriiro qaarkood been abuur ah ah raga iyo dumarku isku qaldaan oo la isugu sheeko sheelooyin been iyo qiyaali ah oo ay ku jiraan ballamo guur oo ay sameeeyaan labo qof oo facebook isugu horreeyey oo aan weligood is arkin .
Sheekooyinkaa qiyaaliga ah ayaaa ku dambeeya meel eber ah oyo hebel ayaa afka furtay ama hebla ayaa afka furatay – taas oo ah qof ka sheekeynayo sheeko qiyaano xambaarsan oo lagu sameeyey.
Sidoo kale baraha bulshada waxay noqdeen gole fadeexo sida Telegram oo Soomaalida aanay marina ma adeegsan dhankiisa wanaaga oo ah in laga heli karo goobo wax lagu barto laakiin ay Soomaalidu ka aadeen dhanka xun oo ah in ay ku soo bandhigaan muuqaallo qaawanaan ah siiba dumarka.
Baraha bulshada wanaag iyo xumaan waa looga faa’ideysan karaa waxaase wanaagsan in loo isticmaalo dhinaca wanaagsan maadaama ay yihiin kuwa maanta qof walba oo dunida jooga uu iska dhex arki karo isagoo ku leh bar ama akon isaga u gaar ah oo afkaartiisa iyo akhbaarta uu hayo fidinteeda uu ku adeegsan karo.
WQ:Mohamed Shiil
