Diinteena Suubban Ganacsiga waxey ku tilmaamtay inuu yahay sida Ribada oo kale balse Alle wuxuu xalaaleeyay Ganacsiga isagoona Xarrimay Ribada.
Ganacsigu waa bixinta adeeg ama gadidda Badeeco taas oo uu qofku kaga raadsado faa’iido.
Haddaba qormadeenan waxaan ku jeex jeexaynaa Burburkii kadib markii la waayay kaalintii Dowladda ee ahayd ilaalinta Badqabka Badeecadda la soo galinayo dalka iyo midda loo iib geynayo dalka dibadiisa waxaa soo if baxay Ganacsato kaliya ay u caddahay faa’iido taas oo markii danbe kaliftay in dalal shisheeye laga keeno daawooyin dhacay, Raashin dhacay balse taariikhda laga badalay iyo daawo tayadeedu aad u hooseyso oo aan wax tari u lahayn Bukaanka loo qoray iyadoo laga raadinayo Faa’iido xad dhaaf ah iyagoo dhinaca kale dhib weyn u geysanaya Bulshada Soomaaliyeed ee tabaaleysan ee la daalaa dhacaya nolasha.
Ganacsatadan waxey iska indha saabeen isla xisaabtanka Rabbi ee maalinta Qiyaamaha ee qof walba illaa afar (4) su’aalood laga waydiinaayo uusan ka hor dhaqaaqi doonin banka Qiyaamaha ee Alle hortiisa ah. Su’aalahaas waxaa ka mid ah in qofka la weydiin doono “Hantidiisa siduu ku kasbatay ama ku soo shaqeysatay iyo sida uu ku bixiyay.” Alle wuxuu weydiinayaa Addoonkiisa isaga oo og oo aan waxba ka qarsooneyn waxa ka dhacayay Konkan, waana hubaal in ciqaabta Rabbi uu muteysan doono qofkii hantidiisa si khaldan ku tabcaday ama meel khaldan ku bixiya oo uusan Rabbi raali ka ahayn. Waxaana suurtagal ah in ciqaabta uu Alle u soo dadajiyo oo uu dunida korkeeda lagu ciqaabo.
Meeshaas waxaa kaaga cad in hantida sidaad ku heshay iyo meesha aad ku bixisay intaba ay ka danbeyso xisaab aan laga gudbi karin ee dadoow Arsaaqaddiina wanaajista.
Cilmi baaris la sameeyay arrintan ayaa xusaysa in dadka u dhinta Daawada khaldan ay ka badan yihiin inta cudurrada caadiga ah u dhinta, waxaana sabab u ah Ganacsadaha dalka soo galiyay daawada dhacday, Raashinka dhacay iyo midda ay tayadeedu liidato.
Wiil aan Habra wadaag nahay oo dalka Hindiya wax ku soo bartay ayaa iiga warray sheeko aan aad uga naxay oo dhex martay isaga iyo Ganacsade Soomaaliyeed oo rabay turjumaan:
Ganacsade: Asc adeer? Ma taqaan Afka Hindida?
Turjumaan: Haa adeer. Maxaan kaa caawiyaa?
Ganacsade: waxaan rabaa inaad ii raacdid Warshadda Daawada oo aad inoo kala turjumto aniga iyo kuwo maamulka Warshadda, adigana khidmaddaada waan ku siin.
Turjumaan: haye, diyaar baan ahay.
Ganacsade: Waxaad u sheegtaa liiskan Daawada ku qoran inuu hayo
Maamulka: waan haynaa ee cadad intee la’eg ayaad rabtaa?
Ganacsade: Horta, fahansi sida aan wax u rabo oo u sheeg tiro aad u badan oo daawadaas oo mid dhacday ah iyo tiro aad u badan oo daawo tayadeedu ka hooseyso midda kor kaga koran inaan rabo u sheeg.
Turjumaan: Acuudka! adeer maxey tahay waxaad sheegaysid?! Alle ka baq!!!
Ganacsade: Adeer waligeen baan sidan ku qaadan jirnay ee u sheeg ninka
Turjumaan: Adeer anigu diyaar uma ihi wax sharci darro ah inaan kaala shaqeeyo oo khiyaano ah. Adduun iyo Aakhiro midna kuma liibaanaysid ee qof kale raadso.
Koley, ganacsadahan hawshuu u socday way caddahay qof caado qaata ahna ma waayayo haddii uu wiilkan iska diiday haseyeeshee arrintan waxey soo if baxday oo ay bulshadu ku baraarugtay ama ogaatay tobankii sanno ee ugu danbeysay inaysan Daawo qudhaata ahayn ee ay ku jiraan Raashin dhacay sida Burka iyo Bariiska … iwn. Waxaana caddeyn u ah bariis caag ah oo muddo laga gadayay Bulshada iyo Bur dhacay oo dhagax isku badday inay Ganacsatada qaar keenaan dalka kadibna intay rag u diraan la burburiyo oo dib loogu cabbeeyo jawaanno cusub.
Tani waxey sababtay cudurro aan dalka lagu arki jirin inay ku dhacaan dad badan oo ay la il daran yihiin Gobolkasta oo dalka ka mid ah.
Dhinaca kale waxaa xusid mudan inay jiraan ganacsato aad u ammaanan oo xalaal miirato ah oo keena dalka wax tayo leh balse qaali ah oo aysan gadan karin dan yarta ah balse aad loo ammaanay waxtarka daawada iyo badeecadaha kale ee ay keenaan.
Haddaba, Dowladda oo ku baraarugtay dhibta iyo Aafada ka dhalay Daawooyinka iyo Raashinka dhacay ayaa dib u yagleeshay Hay’addii Tayo Dhowrka Soomaaliyeed taas oo u xil saaran inay ilaaliso tayada Badeecadaha dalka la soo galinaayo iyo kuwa laga dhoofinaayo ee dalka dibaddiisa loo iib geynaayo ama loo diraayo.
Waxaan ku rajo weyn nahay in dowladnimadeeno xoogeysato oo gacan bir ah ku qabato muwaadiniinta sida khaldan wax uga faa’iida iyo kuwa ku gacan siiya falalka gurracan.
Dalladda ay ku mideysan yihiin Ganacsataduna waxaan leeyahay inta idin suncad xumeynaysa iska qabta ama dowladda u far muuqa si loo badbaadiyo dadka iyo dalka intaba.
Gabagabadii, taladayda ku aaddan Ganacsatada sida khaldan wax u rabta waxaan leeyahay Arsaaqad kuu keenta Curro aan daawo lahay, caruurta oo caasi kaa noqda iyo Cadaabta Rabbi waxaa kaaga kheyr badan wax yar oo xalaal ah inaad ku koobnaatid oo aad Alle u towbad keentid, weydiisatidna Arsaaqad Xalaal ah oo ballaaran oo aad sadaqo kala bixi kartid kana Xajiyi kartid taas oo kuu horseedi karta inaad Adduun iyo Aakhiro intaba ku Liibaantid.
WQ: ABU CIMAADUDIIN
