Soomaaliya waxay leedahay taariikh dheer oo qani ah iyadoo adeegsanaysa fanka gudbinta fariimaha muhiimka ah iyo horumarinta midnimada qaranka,laga soo bilaabo suugaanta,muusiga iyo fanka muuqaalka, dadka Soomaaliyeed waxay had iyo jeer garwaaqsadeen awoodda hal-abuurku u leeyahay dhiirigelinta bulshadooda ee dhinacyadda dhaqanka,dagaalka iyo horumarinta.
Soomaliya ayaa soo martay 15-kii sano ee la soo dhaafay khatarta kooxaha khawaariijta balse marna ma saamaynin doorka fanka iyo suugaanta ee ku aaddan horumarinta waddaniyadda iyo midnimada qormadan ayaan ku faaqidi doonaa siyaabaha ay fannaaniinta,abwaaniinta iyo shakhsiyaadka kale ee hal-abuurka leh ugu isticmaalayaan kartidooda si ay u taageeraan dadaalka ay Soomaaliya ugu jirto in ay dalka uga xorayso kooxaha khawaariijta.
Awooda fanka iyo fariimaha ay ku gudbiyaan fanaaniinta Soomaaliyeed ayaa ah mid aan la dhayalsan Karin iyadoo curiyeyaasha fanka Soomaaliyeed gamayaan weedho ka culus gantaalaha kuwaas oo qayb ka ah halganka iyo dagaalka ka dhanka ah kooxaha khawaariijta kaas oo hadda maraya heer gabo gabo ah.
Muusigu waa aalad si gaar ah ugu awoodda badan horumarinta midnimada iyo waddaniyadda dowladduna door muhiim ah ayay ku leedahay taageeridda fannaaniinta dalka.Tiyaatarka Qaranka iyo Kooxda Hobolada Waaberi oo ah kooxda Qaranka Soomaaliyeed ayaa in muddo ah safka hore kaga jiray dadaallada lagu horumarinayo midnimada iyo hanka Qaranka ee la dagaalanka kooxa khawaariijta.
Bandhig faneedkooda iyo duubistooda, kooxda Hobolada Waaberi waxa ay kaalin weyn ka qaateen horumarinta hidaha iyo dhaqanka Soomaaliyeed, iyo muujinta doorka muhiimka ah ee muusiggu ka qaadan karo horumarinta is-dhexgalka bulshada. Muusiggoodu waa isku-dhafka dhawaaqyo-dhaqameedka Soomaalida oo leh saameyn casri ah, waxaana erayadooda ay inta badan ka hadlayaan arrimo muhiim u ah qaranka, sida halganka lagula jiro kooxaha khawaariijta tamarta daran.
Isku soo wada duuboo, lama soo koobi karo doorka fanka iyo fannaaniinta Soomaaliyeed ku leeyihiin la dagaalanka khawaariijta.
