Ergooyinka ka qaybgalaya Shirweynaha 3-aad ee Dilemmas of Humanity ee ka socday Johannesburg ayaa daba socda weerarrada arxan-darrada ah ee Sahyuuniyadda ee ka dhanka ah shacabka Falastiin iyo iska caabintooda oo ay ka muuqato xiiso iyo walaac xooggan. Weeraradaasi waxay u qaateen qaab dagaal xun oo dabargoyn ah oo ay si bareer ah u taageersan yihiin wadamada Maraykanka, iyo xulafadiisa Yurub. Ka qaybgalayaasha shirkan caalamiga ah waxay caddaynayaan in:- Dhaxalkii kuwii halgankii iyo kuwii ka soo adkaaday midab-takoorka Koonfur Afrika, oo halkaasi shiray, “waxaanu dalbanaynaa in la joojiyo dawladnimada Israa’iil. Waxaan cambaareyneynaa go’doominta Gaza ee lix iyo toban sano jirsatay. Dawladda Israa’iil ee midab-takoorka ah ee la soo rogay iyo go’doominta ayaa ah dambiyo ka dhan ah bini’aadantinimada”.
Waxaan ka soo horjeednaa bay yiraahdeen “dambi ka dhigista iyo bini’aadantinimada ka-xumaynta dadka reer Falastiin, waxaanan difaacaynaa xaqa ay u leeyihiin inay iska caabiyaan. Waxaan diidnay ololaha macluumaadka khaldan ee ay been abuurteen Israa’iil iyo xulafadeeda si ay u abuuraan cuqdad, faafiyaan naceybka iyo qiil gardarrada ka dhanka ah dadka Falastiiniyiinta. Halganka aayo-ka-tashiga, madaxbannaanida, iyo difaaca sharafta aadanaha waa inaan lagu calaamadin “argagixiso.” Intaa waxaa dheer, waxaan cambaareyneynaa oo aan si adag u diidnay dambi-baarista wadajirka Falastiin ee dawladaha qaranka ee taageeraya isir-sifeynta”.
Waxay kaloo bayaankooda ku xuseen, “Waxaan si adag u canaananaynaa ololaha dabar-goynta Israa’iil ee ka dhanka ah Falastiiniyiinta. Tobanaan sano oo Xukuumadda Sahyuuniyadda ah ayaa weerarro ku qaaday shacabka Falastiin, waxaana waajib ah in la fahmo oo la cambaareeyo xasuuqa hadda lagu hayo dadka rayidka ah ee aan hubaysneyn, oo ay ku jiraan carruur, waayeel iyo haween sida arxan-darrada ah ay ciidammada Israa’iil ugu laayeen Marinka Gaza.
Ilaa hadda, ciidamada Israel waxay dileen in ka badan 9, 000 qof, kuwaas oo 3.000 ka mid ah ay yihiin carruur. Dhismayaasha la bartilmaameedsaday iyo kuwa la duqeeyay ayaa ah xarumo adeeg, gaar ahaan isbitaallada, iskuullada, shabakadaha biyaha iyo korontada, kuwaasi oo ah kaabayaasha lagama maarmaanka u ah nolosha. Waxaan cambaareyneynaa weerarka naxariis darada ah iyo waxashnimada ah ee ciidamada Israel ay ku qaadeen isbitaalka Al Ahli ee Gaza, kaasi oo ay ku dhinteen boqolaal dhakhaatiir iyo bukaanno ah”.
“Waxaan kaloo cambaareyneynaa aamusnaanta ceebta ah iyo ka-wada-jirka qaawan ee dowladaha gobolka iyo hay’adaha, iyo sidoo kale gargaarka maaliyadeed iyo kan Milatari ee ay bixiso dowladda Mareykanka si ay u huriso gumaadka Falastiiniyiinta. Waxaan cambaareyneynaa mawqifyada dowladaha ee taageeraya gardarrada iyo in la caadiyeeyo cidda heysata, waxaanan u aragnaa habkaan dhaqdhaqaaq cunsuri iyo faashiste ah”.
Waxaa kaloo bayaankaasi lagu yiri:- “Waxaan aqoonsannahay xuquuqda sharciga ah ee dadka Falastiiniyiinta ee xoreynta ah, madaxbannaanida iyo soo noqoshada sida ay u aqoonsadeen Qaramada Midoobay iyo inta badan dawladaha adduunka.
Waxaan taageereynaa xaqa ay Falastiin u leedahay soo laabashada, waxaanan cambaareyneynaa barakicinta xooggan ee Falastiiniyiinta. In la dalbado in 1.1 milyan oo qof ay ka tagaan dalkooda iyagoo aan heysan meel ay tagaan waa dambi”.
Waxaan ugu baaqaynaa dhammaan xoogagga horumarka leh iyo taageerayaasha xorriyadda adduunka inay isugu soo baxaan waddooyinka iyo fagaarayaasha, oo ay ka qayb qaataan dhammaan noocyada taageerada Falastiin.
“Ku biir baaqa maalin-goboleedka ficilka ee midnimada Falastiin Jimcaha, Oktoobar 20-keedii iyo maalinta caalamiga ah ee midnimada ee Noofambar 4-teeda, 2023-ka. Waxaan sidoo kale ugu yeernaa dhammaan noocyada qaadacaada wax soo saarka Israa’iil iyo soo bandhigida falalka argagixisada ee Israa’iil” ayaa lagu yiri Bayaanka.
Waxaan aqoonsannahay in halganka lagu xoraynayo Falastiin, laguna soo afjarayo gumeysiga Israa’iil uu yahay halganka dhammaan dadka dulman ee xoreynta iyo sharafta. Waa inaan ku jirnaa midnimo oo aan difaacno halganka Falastiiniyiinta ee aaya-ka-talinta, xoraynta, madaxbannaanida, iyo xaqa ay Falastiiniyiintu u leeyihiin inay soo noqdaan.
Waxaan dalbaneynaa:
In si degdeg ah loo joojiyo gardarada iyo xabad joojinta Gaza.
In la joojiyo go’doominta Gaza.
In dhammaan dhulka Falastiin lagu soo celiyo.
In la joojiyo gumeysiga Israel ee Falastiin.
Shirkaasi oo dhacay 14kii Oktoobar 2023-ka, ayna ka qeybgaleen Golaha Shacbiga Caalamiga ah 3-aad ee Dilemmas of Humanity Conference – kaasi ka dhacay Magaalada Johannesburg, ee Wadanka South Africa. Xisbiyada iyo Ururada Saxeexa bayaanka waxay ahayeen in ka badan 100 Ergo.
Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre ayaa sheegay in dhaqdhaqaaqa Xamaas aanu ahayn urur argagixiso, uuna yahay Urur xoreynayo dhulkooda, isagoo ku baaqay in lagama maarmaan ay tahay in la sameeyo xal laba dawladood ah, hadalkaasi waxa uu ka jeediyay munaasabad lagu xusayay Sheekh C/qaadir Al-Jilaani oo lagu qabtay magaalada Muqdisho ayaa yiri: “Waxaa nasiib darro ah in la arko caalamka oo ka aamusan waxa ka socda magaalada Gaza oo 15-kii daqiiqoba hal cunug oo Falastiini ah ayaa ku dhinto, taas oo ka dhalatay duqeynta ay ciidamada Israa’iil u geysteen dad rayid ah oo ay ku jiraan Carruurta iyo Haweenka reer Falastiin”.
“Dowladihii u doodi jiray xuquqda insaanka ayaa ka aamusan oo ku taageersan in Carruur, Haween iyo dad aan waxba galabsan in ay ku baa’biso Israa’iil hub nuucay rabto, iyadoo uu aduunku daawaanayo,waxaa ay gaartay Israa’iil in ay bartilmaameedsato gaadiidkii caafimaadka iyo dhakhaatirtii,isbitaalkii”.
Mudane Xamsa Cabdi Barre ayaa sheegay in reer Gaza laga jaray biyihii, korontadii iyo cunadii oo ay ka hor istagtay Israa’iil, isagoo tilmaamay in xaaladda ka jirta magaalada ay tahay mid adag, waxuuna is waydiiyay halka ay jiraan kuwa u dagaalami jiray xuququl insaankii dadka?.
Raiisulwasaaruhu waxa uu qaatayn go’aan geesinimo leh, islamarkaana ka turjumaya dareenka Shacabka Soomaaliyeed oo 100% Muslim ah, waxaana ereyadii uu jeediyay laga wada hadal hayaa dhammaan Caalamka, waxaan uu soo seddexeey Madax sidaasi oo kale u caddeeysay go’aanka ay ka qaateen arrinta reer Falastiin, kuwaasi oo kale ah Madaxweynayaasha Dalalka Jabuuti iyo Turkiye Mudane Ismaaciil Cumar Geelle iyo Ragib Dayib Erdogan. Aan u duceyno Dadka Reer Falastiin.
