Dadka ku nool Muqdisho tiro aan ka yareyn 40% waa barokacayaal ku nool hareeraha magaalada oo ku jira xaalad adag oo nololeed.
Dadkan waxay ku hoydaan guryo cooshado ah oo aan celin dhaxanta iyo qorraxda midna waxayna subax walba iyaga iyo carruurtooda u soo shaqo tagaan magaalada iyadoo qaar ka mid ah ay ka dawarsadaan dariiqyada waa weyn sida Makka Al Mukarama.
Baahida iyo duruufta dadkan heysata wey badan tahay waxayse ugu daran tahay xilliyada qaar oo ay qorraxda ku dhalandhoolaan iyadoo laga yaabo in aaney maalintaa oo dhan helin wax yar oo ay ku noolaadaan.
Muddooyinkii hore waxaa si toos ah ugu socon jiray gargaar iyo taakulo loo fidiyo dadkaan laakiin haatan waxaad mooddaa in laga mashquulay oo siyaasadda iyo arrimo kale lagu jeestay oo aaney jirin cid xasuusaneysa.
Ka warqabka dadka barokacayaasha ah aad buu u yaraaday sida badan
Lama oga xaaladooda iyo tiradooda sidoo kale waxaa yar wacyigelin arrintaa ku saabsan oo loo fidiyey dadkaa ama lagu gargaaray qalabka la isaga difaaco dhaxanta iyo roobka waxayna u baahan yihiin oo kale maro kaneecada iyo weelal ay wax ku karsadaan.
Dadka barokacayaasha ah mar walba wey ku soo biiraan xarumaha bara kaca iyagoo inta badan muddooyinkan dambe ka imaanayey gobollada kala duwan ee dagaalladu saameeyeen gaar ahaan Sh/hoose, Sh/dhexe, Baay iyo meelo kale weliba imaanaya iyagoo aan waxba heysan kana soo cararaya dagaallo ka jira goobihii ay degenaayeen.
Sida badan Barakacayaasha ma heystaan daryeel fiican oo caafimaad mana heli karaan lacago ay ku tagaan isbitaalada magaalada oo u badan kuwo gaar loo leeyahay oo lacag wax ku daweeya.
Ka sukoow arrimahan waxay dhibaatada ugu badani la soo deristaa xilli roobaadka waxayna roobabku qaadaan inta badan degaannadooda ama xeryaha ay ku nool yihiin.
Sidoo kalena, waxaa halkaas ka dhasha cudurro ay ku jiraan malaariyada iyo shubanka
Dadkan barokacayaasha ah ma jirto cid kale oo ay sugayaan oo aan aheyn shacabkooda oo ay gacan uga baahan yihiin.
Shacabka soomaaliyeed waa in ay gacan siiyaan dadkaa sidoo kalena la abaabulo qorsheyaal dhaqaale, deeq raashin iyo waxyaabaha kale ee daruuriga ah.
WQ: Mohamed Shiil
