Waxaa maanta tababar ku saabsan fulinta howlgalada gaarka gaar ah loogu soo xiray xerada General Dhegabadan ee magaalada Muqdisho askar ka tirsan ciidanka Booliis Militaaro. Tababarkan oo socday muddo saddex bilood ah ayaa lagu baranayey xirfado gaar ah oo la xiriira howlgalada gaarka ah, iyadoona ay ka faa’iideysteen ku dhawaad 30 askari
Munaasabadda xiritaanka tababarka ayaa waxaa ka soo qeyb galay safiirka Midowga Yurub ee Soomaaliya, Karin Johansson, iyo taliye ku xigeenka ciidanka lugta ee xoogga dalka Soomaaliyeed, General Cabdullaahi Aaden Xuseen (Ciro). Sidoo kale, waxaa madasha joogay mas’uuliyiin kale oo ka socday Midowga Yurub iyo marti sharaf kale.
Safiirka Midowga Yurub ee Soomaaliya, Karin Johansson, oo hadal ka jeedisay munaasabadda, ayaa sheegtay in Midowga Yurub uu ka go’an yahay inuu taageero ciidamada Soomaaliya, si ay u noqdaan kuwo xirfad sare leh oo u adeegaya amniga iyo xasilloonida dalka.
Dhankiisa, Jeneral Cabdullaahi Aaden Xuseen (Ciro) ayaa uga mahadceliyay Midowga Yurub taageerada ay siiyaan ciidamada qalabka sida ee Soomaaliyeed. Waxa uu ku boorriyay askarta iyo saraakiil xigeennada ka faa’iidaystay tababarkan inay ku dabaqaan aqoonta iyo xirfadaha ay barteen si ay u gutaan waajibaadkooda Qaran.
Tababarkan oo qeyb ka ah iskaashiga dhinaca amniga ee u dhexeeya Soomaaliya iyo Midowga Yurub ayaa lagu sheegay inuu yahay mid muhiim ah oo gacan ka geysanaya dib u dhiska hay’adaha ammaanka ee dalka.
Dhammaadka munaasabadda, waxaa la guddoonsiiyay askarta iyo saraakiil xigeennada tababarka qaatay shahaadooyin iyo qalab loogu talagalay howlgalada ay fulin doonaan mustaqbalka.
