𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐗𝐚𝐦𝐬𝐚 𝐨𝐨 𝐪𝐚𝐚𝐛𝐢𝐥𝐚𝐲 𝐗𝐨𝐠𝐡𝐚𝐲𝐚𝐡𝐚 𝐆𝐮𝐮𝐝 𝐞𝐞 𝐀𝐚𝐠𝐠𝐚 𝐆𝐚𝐧𝐚𝐜𝐬𝐢𝐠𝐚 𝐗𝐨𝐫𝐭𝐚 𝐚𝐡 𝐞𝐞 𝐐𝐚𝐚𝐫𝐚𝐝𝐝𝐚 𝐀𝐟𝐫𝐢𝐤𝐚

Muqdisho,(Wargeyska Dalka):- Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa Xafiiskiisa ku qaabilay Xoghayaha Guud ee Aagga Ganacsiga Xorta ah ee Qaaradda Afrika (AfCFTA), Mudane Wamkele Mene, oo booqasho rasmi ah ku yimid Dalka.

Ra’iisul Wasaare Xamsa Cabdi Barre, ayaa sheegay in booqashada Xoghayaha Guud ee AfCFTA, ay ku soo beegantay xilli muhiim ah oo Soomaaliya ay qaadatay go’aan Qaran oo ay uga mid noqonayso Nidaamka Ganacsiga Xorta ah, ee Qaaradda Afrika, isaga oo xusay in loo baahanyahay in la dhaqan-galiyo Heshiisyada Ganacsi ee wax-soo-saarka sarreeya si Bulshada Gobolka iyo Dadka Soomaaliyeed uga wada Faa’ideystaan fursadaha uu AfCFTA.

Mudane Xamsa, ayaa tilmaamay in Soomaaliya ku jirto marxalad cusub oo dhanka dhaqaalaha ah, iyada oo xoogga la saarayo hirgalinta Qorshaha Isbeddelka Qaranka 2025–2029, xoojinta Hay’adaha Dowladda, Horumarinta Maalgashiga iyo kobcinta wax-soo-saarka Gudaha.

Ra’iisul Wasaare Xamsa, ayaa la wadaagay Wafdiga, Fursadaha ka jira Dalkeenna oo ay ka mid tahay Xeebta ugu dheer Qaaradda, iyo Dekedaha iyo Marrinada muhiimka ah ee Dalku leeyahay ee Istaraatiijiga ah iyo in Dowladda ay mudnaan siinayso kordhinta qiime-darista wax-soo-saarka Gudaha, gaar ahaan Beeraha, Xoolaha iyo Kalluumeysiga, si badeecooyinka Soomaaliyeed loogu diyaariyo heerarka Caalamiga ah.

Mudane Wamkele Mene, ayaa Ra’iisul Wasaaraha uga mahadceliyay qaabiladdiisa, ayaa xusay in uu Indhihiisa ku arkay Horumarka Kaabeyaasha Dhaqaalaha ee Dalku ku tallaabsatay gaar ahaan dhinacyada wax-soo-saarka, xoojinta hey’adaha dowladda iyo qorshayaasha kale ee lagu casriyeynayo Qaranka Soomaaliyeed.