Muqdisho (Wargeyska Dalka): Wasiirka Gaashaandhigga Jamhuuriyadda Federaalka Soomaaliya mudane Axmed Macallin Fiqi ayaa Maanta kulan la yeeshay Safiirka Jamhuuriyadda Dadka Shiinaha u fadhiya Soomaaliya, Danjire Wang Yu.
Kulanka ayaa diiradda lagu saaray Xoojinta Iskaashiga Labada Dal ee dhinacyada kala Duwan, Guulaha Ciidamada Qalabka Sida ay ka gaareen Furimaha la-Dagaallanka Argagixisada, iyo doorka Saaxiibada Soomaaliya ee Taageerada iyo Awoodsiinta Ciidanka Xoogga Dalka Soomaaliyeed.
Sidoo kale, Labada dhinac ayaa ka wada hadlay Muhiimadda ay Xasilloonida Soomaaliya u leedahay Nabadda iyo Amniga Guud ee Gobolka Geeska Afrika.
Ugu Dambayn, Wasiirka ayaa Hambalyo u diray Dowladda iyo Shacabka Jamhuuriyadda Dadka Shiinaha, Gaar ahaan Safaaradda Shiinaha ee Soomaaliya, Munaasabadda Sannadka Cusub ee Shiinaha.
