Waxaa si rasmi ah ugu furmey dalka Boqortooyada Sacuudi Carabiya, gaar ahaan magaalada Jeddah shir-weynaha/Maxdarka guud ee sanadlaha ah, kaasoo socon doona muddo 3 maalmood ah, laguna saxiixayo qoondada Xujeyda ee sanad walba ay Dowladaha Islaamka loo qoondeeyo.
Wasiirka Awqaafta iyo Arrimaha Islaamka ee Soomaaliya mudane Mukhtar Robow Ali, ayaa ka qeyb galay furitaanka maxdarka, isagoo ugu dambeyntiiba saxiixay heshiiska qoondada Xujeyda ee Dalka Soomaaliya sanadka 2025/1446, taasoo ah 11, 500 Xaaji.
Kulankan sanadlaha ah ayaa ah mid muhiimad weyn u leh qorsheynta iyo fududeynta adeegyada Xujeyda, sidoo kale na la xoojinaya iskaashiga ka dhaxeeya dowladaha Islaamka.
Inta uu socdo maxdarka, waxaa sidoo kale lagu falanqeyn doonaa horumarinta adeegyada iyo qorsheyaasha daryeelka Xujeyda, si loo hubiyo inay si habsami leh u gutaan waajibaadka Xajj-ka.
