Ugu yaraan 11 falastiiniyiin ah ayaa lagu soo waramayaa in lagu dilay Daanta Galbeed ee la haysto, iyadoo militariga Israa’iil ay sii wadaan duullaankii ugu weynaa ee ku dhawaad labaatan sano, kaas oo ay ku lug leeyihiin boqollaal ciidan.
Shan ka mid ah 11 kan ruux ayaa lagu soo waramayaa in lagu dilay weerar cirka ah oo ka dhacay xerada qaxootiga ee Al-Fara, halka lix kalana lagu dilay duqeyn diyaaradeed iyo iska horimaad hubeysan oo ka dhacay Jenin.
Dhimashada dadkan Falastiiniyiinta ah ayaa yimid xilli ciidamada Israel ay howlgallo la beegsadeen afar magaallo oo kala ah Jenin, Tulkam, Nablus iyo Tubas,iyagoo adeegsanaaya boqollaal ciidan oo ka dagaalama dhulka iyo cirka.
Waa markii ugu horeysay ee ciidamada Israel ay mar qura qaadaan weerar lagu beegsanaayo dhowr magaalo marka laga yimaado kacdoonadii weynaa ee dhacay 2000 ilaa 2005.
Wasiirka arrimaha dibadda Israa’iil, Israel Katz, ayaa sheegay in ciidamada difaaca Israa’iil ay xalay si buuxda uga hawlgalayeen xerooyinka qaxootiga ee Jenin iyo Tulkarm si ay u burburiyaan waxa ay ku sheegeen xarumaha ay maalgaliyaan Iran ee halkaas laga hirgeliyey.
Wasiirka ayaa ku baaqay in Falastiiniyiinta laga barakiciyo deegaannada waqooyiga la haysto ee Daanta Galbeed, isaga oo is barbar dhigay xaaladda dagaalka iyo muhiimadda marinka Qaza.
40,476 qof ayaa la dilay, 93,647 kalana waxaa soo gaaray dhaawacyo kadib dagaalka Israa’iil ee Gaza,kaas oo bilowday 7-dii Oktoobar ee sanadkii hore.
