Waxaan ku howllanahay wareysi (qaabilaaddii) ugu horeeyey noloshayda, si aan ugu helo shaqo heer sare ah mid kamida shirkadaha waa weyn, haddii aan ku guulaysto waxaa iskaga tegi doonaa gurigan dhibka badan waxaan ka nasan doonaa canaanta joogtada ah ee Aabahay.
Niyad jabta aan dareemayey in badan oo aan shaqo la’aan ahaa iyo hamiga oo igu yaraa taana waxaa sabab u ah joogista guriga oo caajis iyo han yari igu beeray.
Maalintii wakhti hore ayaan soo kacay waan qubaystay waxaan ku lebistay wixii ugu qurxoonaa ee aan heli karay, baraafuun oo aan isku buufiyey, markaan damcay inaan albaabka ka baxo, ayaa waxaa garabka iga taabatay gacan, gadaal ayaan u jaleecay mise waa Aabahay oo dhoola caddeynaya, inkastoo ilgo’a jiradu si cad uga muuqatey wejigiisa.
Wuxuu ii dhiibay xoogaa lacag ah wuxuuna igu yiri: waxaan kaa doonayaa inaad noqoto qof dhinaca san wax ka eega (iijaabi), naftaadana ku kalsoonoow, su’aal kastoo lagu waydiiyo ha khalkhalin.
Waan dhegaystay taladii Aabahay anigoo qalbiga ka dhibsanaya, oo isle ilaa hadda ma wuxuu ila dabo taagan yahay waano, waxaan ba moodaa inuu u danleeyahay inuu I dhibo wakhtigii ugu farxda badnayd noloshayda.
Guriga ayaan dhakhso uga soo baxay waxaan ijaartey/kireystay taksi waxaan aadey meeshii shirkaddu ku qabanaysey warreysiga (qaabilaada).
Markaan ka soo galay albaabka shirkadda waxaan layaabey!!!
Waardiye ma joogo albaabka, shaqaale wax soo dhoweeya ma laha keliya tabeelayaal ayaa ku hagaya ilaa meesha interfiyuuga laga gaaro.
Markaan albaabka ka soogalay waxaan arkey gacankii albaabka oo albaabka ka laalaada qarkana u saran inuu jabo haddii qof ku dhaco.
Waxaan soo xusuustay waanadii Aabahay ee markaan guriga ka soo baxay uu igu soo sagootiyey (noqoto qof dhinaca san wax ka eega (iijaabi)).
Isla makiiba gacankii albaabka ayaan halkiisii ku celiyey, waana hagaajiyey oo aan ku adkeeyey booskiisii.
Kadibna tilmaamihii tabeelayaasha ayaan raacay waxaan soo gaaray beertii (jardiinkii) shirkadda, waxaan arkey marinkii oo biyihii ku soo faafeen, waxayna u muuqatey in ninkii ka shaqaynayey uu ka mashquulay.
Waxaan soo xusuustey canaantii Aabahay uu igu canaanan jiray inaanan biyaha beerdareeyn.
Isla markiiba tuubadii ayaa ka bixiyey oo waxaan ku duwey meel qalalan, biyaha socodkoodana waan yareeyey si ayna durba u buuxsamin ilaa uu ka soo laabto jardiino yeerigii ( ninka beerta ka shaqeeya).
Kadibna waxaan horey u galay dhismihii anigoo raacaya tilmaanta tabeelaha ee falaadha, markaan sii fuulayey jaranjarada waxaan arkey tiro aad u badan oo nalal ah oo shidan waxaan joognaa dharaar cad, si degdeg ah ayaan u demiyey anigoo ka baqaya qayladii Aabahay uu igu qaylin jirey mar walba oo uu arko wax khaldan.
WQ: C/wali Daljir
