Wasiirka arrimaha dibadda dowladda FS mudane Abshir Cumar Jaamac (Haruuse) ayaa maanta Muqdisho kulan kula yeeshay safiirka dowladda Ruushka u qaabilsan Soomaaliya danjire Mikhail Golovanov.
Kulanka ayaa looga hadlay qodobo dhowr ah oo ay ka mid yihiin tartanka ay Soomaaliya ugu jirto kurisga aan joogtada ahayn ee golaha ammaanka ee Qaramada Midoobay in Ruushku Soomaaliya ku taageero, cunaqabataynta hubka ee waqtiga dheer Soomaaliya saaran iyo dayn cafinta maadaama Ruushku ka mid yahay dalalka daynta ku leh Soomaaliya.
Sidoo kale kulanka ayaa looga hadlay xoojinta iskaashiga labada dal, gaar ahaan dhinacyada Diblumaasiyadda caalamiga ah, ammaanka iyo kordhinta deeqaha waxbarasho ee ardayda Soomaaliyeed ka helaan dalka Ruushka.
