Guddoomiyaha Gobolka Banaadir Ahna Duqa Magaalada Muqdisho Mudane, Yuusuf Xuseen Jimcaale (Madaale) ayaa Munaasabad Afur iyo dhiirragelin isugu jirtay kala qeybgalay Cayaartoyda iyo Maamulka Deegaanka Gubadley, kuwaasi oo ku guuleystay Koobka Kubadda Cagta ee Degmooyinka iyo Deegaanada Gobolka Banaadir iyo Degmada Balcad oo 22 Bishaan lagu soo gabagabeeyay Garoonka Eng. Yariisow Stadium.
Munaasabadan dhiiragelinta oo uu soo qaban qaabiyay Xildhibaan Maxamed Abuukar Islaw (Ducaale) ayaa waxaa goobjoog ka ahaa Ra’iisul Wasaare Kuxigeenka Xukuumada Federaalka Soomaaliya, Wasiiro, Xildhibaano, Guddoomiye Kuxieenada Maamulka Gobolka Banaadir, Madaxda Xiriirka Kubadda Cagta, Saraakiil, Guddoomiyeyaal Degmo, Bahda Isboortiga iyo Marti sharaf kale.
Duqa Magaalada Muqdisho oo khudbad kooban ka jeediyay Munaasabada ayaa markale ugu Hambalyeeyay Cayaartoyda Deegaanka Gubadley Guusha ee ka gaareen Koobka Cayaaraha Kubadda Cagta ee Degmooyinka iyo Deegaanada Gobolka Banaadir iyo Degmada Balcad, asigoona ka dhawaajiyay in si gaar ah Maamulkiisa uu munaasabad u sameyn doonni Cayaartoyda, sidoo kalena uu Maamulkiisa ka shaqeyn doonno sidii Degmo loogu dhigi lahaa Deegaanka Gubadley.
