Dhallinyarada waa cududda Dal walba oo dunida ka tirsan ugu muhiimsan ahna awooda ugu badan oo ay ummaduhu ku tiirsan yihiin.
Dalka Soomaaliya ayaa Dadkiisa Boqolkiiba in ka badan Toddobaatan ay yihiin dhallinyaro awooddaa oo u baahan in si waxtar leh looga faa’iideysto.
Maxamed Faarax Cabdi waa nin dhallinyaro ah oo ku nool Muqdisho wuxuuna sheegay in muddooyinkii ugu dambeeyey dhallinayarada ay noqdeeen awood si qaldan looga faa’ideysto isagoo xusay in dhallinayarada loo adeegsaday dagaalladii sokeeye iyo iska hor imaadyadii qabaa’ilka, sidoo kalene ay jiraan siyaabo kale oo fara badan oo awooddooda si xun looga faa’iideystay.
“Dhallinta waxaa u baxay magac xun oo aan ka harin oo ah MALLIBANEYAAL LAGU LIIBAANAY..waxaana jirta in xaaladahaasi ay ilaa haatan weli muuqdaan oo dhallinayaro badan muruqooda iyo maskaxdooda weli ay ku bixinayaan meelo aan ku habbooneyn” ayuu yiri Maxamed.
Dhallinyarada maanta haddii looga faa’iideysto sida saxda ah waxaa la gaari karaa nabad iyo horumar buuxa maadaama awoodda dhallinyarada looga faa’iideysan karo wanaag iyo xumaanta labadaba .
Waxaan ognahay in in kumanaan dhallinayaro ah ay ku bas beeleen dagaallo iyo colaaad ay ka faa’iideysteen kuwii adeegsanayey oo ay ku jiraan siyaasiyiin , dagaal oogeyaal iyo wadaaddo si qaldan wax u rabay, taasi oo keentay in dhallintu ku hoobtaan wax aan iyaga faa’iido ugu jirin.
Dhallinyarada qaar ee habkaas looga faa’iideystay oo qaarkood xubnahooda ku waayey dagaallo aan iyaga wax dan ah ugu jirin ama laga dhigtay jaranjaro siyaasadda lagu gaaro ayaa qaarkood weli lagu arkayaa dariiqyada iyaga oo xubnahooda qaar ku waayey dagaalladaa ama ku waasheeen maanatana aaney jirin cid wax u tareysa ama ku faleysa oo la socota xaaladooda.
Cilmi Xasan oo ah aqoonyahan ku nool Muqdisho ayaa sheegay in dhallinyaro badan hore loogu qalday xaalado looga bayacmushtaray dhiigooda lagana dhigtay xaabo lagu shito dabka ka dibna ciddii sidaas ku sameysay aany dib u soo eegin oo ay ka dhaqaaqday.
“Imisa ayaa isbitaallada iyagoo dhaawac ah lagu soo xooray dibna aan loogu soo noqon oo halkaas ku dhinatay..imisaa maanta darbiyada gaajo ku heysaa iyagoo dhaawac ah ciddii ay dartood u dhaawacmeenna ay gaari qurux badan magaalada kula dhex ordayaan “ ayuu yiri Cilmi.
Dhallinyarada waxaa la gudboon in ay fahmaan dabinnada ay hore ugu dhaceen oo lagu qaldin magac Qabiil, Diin ama Kooxeysi, maadaama aan ognahay kuwa sidaas doonaya dhammaantood aaney nolosha dhallinyarada dan ka laheyn balse ay doonayaan in ay danahooda ku gaaraan.
Qoriga oo ay dhigaan kuna bedelaan Qalinka ayaa dhallinayaradu kaga qeyb qaadan karaan horumarka, nabadda iyo ammaanka dalka, taas oo ay ku gaari karaan hiigsigooda ah in ay helaan sharaf iyo cisi ay ku noolaadaan.
Aqoonta oo ay isku hubeeyaan ayaa ugu wanaagsan in ay qaadaan oo garabkooda saaraan qori ujeedada laga leeyahay aaney hubin oo qofka u dhiibayaa uu wato qiyaanooyin uu ku dhagrayo qofka dhallinyarada ah ee uu rabo in uu ku gaaro ujeedadiisa.
Dhallinyarada waa in ay gartaan dhagarta loo maleegayo oo aaney noqon xaabo wax lagu shito marka laga gaaro ujeedada laga leeyahayna laga dhaqaaqo
WQ: Mohamed Shiil.
