Wasiirka Warfaafinta, Dhaqanka iyo Dalxiiska XFS, mudane Daa’uud Aweys Jaamac ayaa maanta xarunta wasaaradda kulan gaar ah kula yeeshay safiirka dowladda Talyaaniga u jooga Soomaaliya, Alberto Vecchi.
Labada masu’uul ayaa ka wada hadlay adkaynta xiriirka labada dal, gaar ahaan tayaynta dhinacyada Warbaahinta, dhaqanka iyo dalxiiska oo uu Safiirku sheegay inay dowladdiisu ka taageeri doonto Soomaaliya.
Wasiir Daa’uud Aweys ayaa sheegay in warbaahinta Soomaaliya ay soo xoogeysanaysay waqtiyadii u dambeeyay, taas oo ay soo kabashadeedu gacan xoog leh ka geysteen dowlado ay ugu horreyso Talyaaniga.
Wasiirka warfaafinta XFS ayaa sheegay inay si gaar ah diiradda u saareen isaga iyo Safiirku xoojinta arrimaha dhaqanka iyo dalxiiska, taas oo muhiim u ah dhaqaalaha dalka shaqa abuurna u noqon karta dhallinyarada Soomaaliyeed, maaddaama dalku uu aad ugu wanaagsan yahay dalxiiska.
