Adduunyada aan ku noolnahay, Waxaa abuuray Allaah Rabul Caalamiin, ujeeddaduna waxay ahayd in dadkoo dhan ay Ilaahey caabudaan.
Adduunyadan markii la abuuray Allahii na abuuray wuxuu usoo dejiyay manhajkii iyo sharcigii lagu dhaqi lahaa dadka ku nool dhexdeeda, waxbana lagama tegin, oo wixii xukun ah way ku dhameystiran yihiin.
Allaah Rabul Caalamiin ayaa ka nasahan xumaan idilkeeda, Allaah ayaa naga xaaraantinimeyay in aan isdulmino iskuna xad-gudubno iyadoo la adeegsanayo awood sheegasho noocey rabto ha ahaatee iyo kipir.
Nabi Aadam Cs iyo Xaawo, markii Ilaahay dajiyay Jannada loona amray inay cunaan wax waliba oo jannada gudaheeda ahaaday illaa geeda shajaratu saquum la yiraahdo, laakiin waxaa dulmiyay Shaydaan oo u siineeyay geedkii laga celiyay ee shajaratu saquumka ahaa, way cuneen dibadda ayaana looga soo saaray jannadii macaanta badneyd.
Sidoo kale, qaabiil ayaa dulmiyay walaalkiisa haabiil, wuuna dilay Marka dulmigu maahan wax hadda beni’aadamka dhexdiisa ku cusub ee waa wax soo jireen ah illaa maantadan aan adduunka korkiisa joogno.
Adduunyadan aan ku noolnahay waxaa mar waliba laga helaa nin wax dulminaya iyo mid la dulminayo, balse Allaah Rabul Caalamiin wuxuu maciisu yahay la dulmiyaha lagu xad-gudbay.
Waayo la dulmaha badana wax awood ah malaha, wuxuuna yiraahdaa Allaa jooga oo dacwadiisa wuxuu u tebiyaa kor ahaayee Ilaahiisa qaaliga ah ee wax waliba u jeeda.
Dulmiga waxaan uga digayaa inay ku dhaqmaan oo caadeystaan bulshadeenna qaarkeed, waayo ducada madluumku celis malaha, waana arrin khatar ah.
Ma wanaagsana in wax waliba leyska fududeysto, waayo aadanaha waxaa ku jira kuwo Ilaaheey barakeeyay uuna karaameeyay.
Dulmiga waa wax xun waxaana geysta badana kuwo wax megarata ah oo aysan waxba qiimo ah la lahayn nolosha basharka daciifka ah.
Iyadoo dad badani ay wax waliba ogyihiin ayey haddan u sameeyaan kibir iyo islaweyni, iyo maxaad sameyn kartaa waa dhaqanka ugu badan uguna xun.
Haddaad dib u fiiriso xilliyadii dadku baarbarka ahaa, ninba ninkuu ka xoog badan yahay ayuu dhacayay, dilayay ka qaadanayay wuxuu heysto, oo qoom meel deggan oo nabad qaba ayaa qoom kale ku soo duulayeen oo baaba’ ka dhigi jireen.
Dhaqankaasi foosha xun weli kama dhamaanin adduunyada oo weli dadbaa ku dhaqma dhammaan caalamka oo idilna waa laga helaa.
Haddaad u fiirsato aflaamta hindiga ama mareykanka waxay qaarkood ku saleysan yihiin qolo wax dulmineysa iyo qolo la dulminayo ka dibna sameynayaan rifengi ama aarsasho.
Laakiin xilligan casriga ah ee adduunku marayo qarnigii 21aad inay dadka iska sii wataan dulmiga iyo gardarooyinka ku xad-gudubka ah waa laga fiican yahay, haddii la yiraahdo ninba ninkuu ka awood badan yahay dalka haka saaro, waxaan bulshadeenna u sheegayaa in ay iska ilaaliyaan ku xad-gudubka nafta iyo maalka, sharafta iyo karaamada birimageydada iyo guud ahaanba addoomada Ilaahey.
Xaqiiqo waxaa ah haddii aad intaasi sameysaan in aad guuleysan doontaan, waayo wax waliba waxaa ka horreeya raali gelinta Ilaahey Ruuxii Ilaahey raali ka noqdana ma jiro axad is hortaagi karo.
Guuleysta oo qaata Waanada iyo Alle ka cabsiga, badiya towba keenka, si Alle nooga cafiyo danbiyadeenna kuwii hore iyo kuwii danbaba.
WQ: Osman Dhiblaawe.
