Magaalada Muqdisho marka aad tagto farmashiyeyaasha lagu gado dawooyinka waxaad arkeysaa dadyow aad u fara badan oo imaanaya isla markaana weydiisanaya in laga gado dawooyin aaney u wadan qoraalka dhaqaatiirta.
Maxamed Axmed Hilowle oo ah gade farmashiye ku yaalla Muqdisho ayaa ii sheegay in uu xilliyada u badan habeenkii uu la kulmo dad da’ kasta leh oo weydiinaya dawooyin ay magic ahaan u sheegayaan ama wata qolof ama baakado hore looga isticmaalay dawooyin hore loogu qoray dad kale iyagoo doonaya in ay isku daweeyaan iyagoo aan u tagin wax dhaqtar ah ama aan sidan waraaqihii dhaqtarka.
“Mararka qaar waxay ku leeyihiin I sii daawadan iyagoo ku tusaya qlofka ama baakadda dawo hore loo isticmaalay marka aad weydiiso warqaddii dhaqtarkana wey kugu xanaaqayaan” ayuuna yiri.
Dadka qaar ayaa ku adkeysanaya in haddiiba ay heystaan qolofka ama baakadda dawadii ay hore ugu caafimaadeen aan loo baahneyn in ay dhaqtar u tagaan oo uu soo qoro waraaq.
Waxaa kale oo jira dhallinyaro iyagana habeenkii mashquuliya farmashiyeyaasha oo ka raadiya dawooyin ay dhinac kale u adeegsadaan oo qaarkood maandooriye ahaan u isticmaalaan .
“Kuwani waxay isticmaalaan oo ay mar walba weydiiyaan noocyo kaniino ah oo ay ku jiraan Taramadol, Diazapem iyo kuwo kale oo ay si aan xad laheyn u qaataan waxaase soo kordhay kuwo ay aad u raadiyaan oo ay isku duraan” ayuu yiri Maxamed Cilmi oo ah kalkaaliye caafimaad oo iibiya farmashiye ku yaalla xamar jadiid.
Dhaqtar Cali Maxamed Maxamuud oo ka mid ah dhaqaatiirta Muqdisho ayaa sheegay in qaadashada dawo aan laguu qorin ay leedahay dhibaato isla markaana ay ka dhalan karaan cuduro halis ah.
“Waxaa tusaale loogu soo qaadan karaa in dadka joogtada u isticmaala kiniinka hurdada ee aan loo qorin una isticmaala mukhaadaraad ahaan ay marka dambe qaadi karaan cudurada ay ku jiraan laleelmada iyo gariirka” ayuu yiri dhaqtarka.
Waxaa uu ka digay in aan la caadeysan in la qaato dawooyin aan dhaqtar qorin taas oo ah dhibaato taagan oo ku soo kordheysa gayiga soomaalida gaar ahaan dhallinyarada.
WQ: Mohamed Shiil
