Madaxa maamulka ku meel gaadhka ah ee Mali, Korneyl Asimi Guetta, ayaa cafis u fidiyay 49 Askari oo u dhashay Ivory Coast, kuwaas oo la xiray sannadkii hore.
Ciidamadan ayaa lagu xukumay xabsi, ka dib markii lagu helay eedaymo ay ka mid ahayeen shirqoollo ka dhan ah Dawladda Mali iyo inay khatar ku yihiin ammaanka dalkaas. .
Askartan ayaa lagu xiray Garoonka Diyaaradaha ee Bamako bishii July ee sanadkii tagay, golaha Milateriga Mali, ayaa Askartan ku tilmaamay calooshood u shaqeystayaal, halka Ivory Coast ay sheegtay in ay qeyb ka ahaayeen howlgalka nabad ilaalinta ee Qaramada Midoobay.
Maamulka Mali ayaa Askartan ku xukumay 20 sano oo xarig ah 30-kii December 2022-kii, kadib markii lagu eedeeyay in ay isku dayeen in ay wax u dhimaan ammaanka dalka Mali.
Ugu danbeyntii Madaxwaynaha ku meel gaadhka ah ee Mali, Korneyl Asimi Guetta, ayaa cafis u fidiyay oo gabi ahaanba baabi’iyay xukunkii lagu riday Askartan u dhalatay Ivory Coast, sida uu warbaahinta u sheegay afhayeen u hadlay Dawladda Mali.
