Maxkamad Maraykan ah ayaa dembi ku heshay laba nin oo lagu eedeeyey inay maleegeen qorshe lagu afduubayo Guddoomiyaha Gobolka Michigan, Gretchen Whitmer, sannadkii 2020, kuwaas oo doonayey inay afduubaan Guddoomiyaha, iyagoo sidoo kale qorsheeyey inay qarxiyaan buundooyin isla markaasna ay bartilmaameedsadaan ciidanka boolisku, haddii ay u soo gurmadaan inta uu socdo falka afduubku.
Adam Fox iyo Barry Croft Jr. ayaa sidoo kale lagu helay dembi kale oo ah, inay qorsheeyeen inay helaan hubka wax gumaada, oo ay ku jiraan, bam lagu qarxiyo buundo iyo in la jahawareeriyo ciidanka booliska, xilliga uu socdo qorshaha lagu afduubayo Guddoomiyaha gobolka Michigan.
Barry Croft Jr. oo ah dareewal kaxeeya Gaadiidka waweyn, kana soo jeeda gobolka Delaware ee dalka Maraykanka, ayaa sidoo kale lagu xukumay eedo kale oo la xiriira inay haysteen walxo qarxa.
Kiiskan ayaa baaritaankiisu bilawday, ka dib markii uu Dan Chappel oo hore ugu soo dagaalamay dalka Maraykanka oo ka tirsanaa koox sida ciidanka militariga u tababaran oo ka dhisan gobolka Michigan, uu sheegay inuu maqlay, xubno ka sheekaysanaya inay laayaan ciidanka Booliska. Ninkan ayaa aqblay inuu si hoose ula shaqeeyo laanta dembi baarista Maraykanka ee FBI.
Dan Chappel oo si dhow ula shaqaynayey kooxda qorshaynaysay inay afduubaan barasaabka Michigan, ayaa bilaabay inuu si hoose u duubo sheekooyinkooda, isagoo ka qayb gelayay tababarada loogu diyaargaroobayo afduubka guddoomiyaha gobolka.
Caddaymaha uu soo ururiyey ayaa loo adeegsaday in lagu fashiliyo shirqoolkaas isla markaana la soo xiro.
