Dowladda Turkiga ayaa diyaarinaysa mashruuc cusub oo 1 milyan oo qaxooti Suuriyaan ah ay si iskood ah ugu laabanayaan dalkooda.
“Waxaan fulin doonaa mashruucan dhawaan anagoo kaashanayna hay’adaha aan dawliga ahayn ee qaranka iyo kuwa caalamiga ah,” Recep Tayyip Erdogan ayaa ka sheegay xafladda furitaanka guryo cusub oo laga dhisay magaalada Idlib ee waqooyiga Suuriya.
Tan iyo markii Turkiga uu bilaabay howlgallada ka dhanka ah argagixisada ee xuduudaha 2016, ku dhawaad 500,000 oo qof ayaa ku laabtay aagagga nabdoon ee waqooyiga Suuriya, sida uu sheegay madaxweynaha Turkiga, isaga oo hoosta ka xariiqay in in ka badan 57,000 guri ku dhow 50,000 qoys ilaa hadda laga dhisay aagga Idlib.
Dhanka kale Wasiirka Arrimaha Gudaha ee Turkiga Suleyman Soylu ayaa xariga ka jaray dhisme loogu talagalay carruurta agoonta ah iyo masaajid ay hay’adaha aan dawliga ahayn ee Turkiga ka dhiseen magaalada Idlib.
Guud ahaan, waxaa jiri doona 100,000 oo guri kuwaas oo ka qayb qaadan doona yaraynta dhibaatada Suuriya, ayuu yidhi Erdogan.
Waxa kale oo uu sheegay in goobta laga dhisayo guryaha ay yeelan doonaan masaajid, dugsi, xarun caafimaad,warshada rootiga, goob bulsho, iyo garoon ay ku ciyaaraan.
