𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐗𝐚𝐦𝐬𝐚 𝐨𝐨 𝐡𝐚𝐦𝐛𝐚𝐥𝐲𝐨 𝐮 𝐝𝐢𝐫𝐚𝐲 𝐆𝐮𝐝𝐝𝐨𝐨𝐨𝐧𝐤𝐚 𝐜𝐮𝐬𝐮𝐛 𝐞𝐞 𝐆𝐨𝐥𝐚𝐡𝐚 𝐒𝐡𝐚𝐜𝐚𝐛𝐤𝐚 𝐁𝐚𝐫𝐥𝐚𝐦𝐚𝐚𝐧𝐤𝐚 𝐉𝐅𝐒

Muqdisho(Wargeyska Dalka):-Ra’iisul Wasaaraha Xukuumadda Jamhuuriyadda Federaalka Soomaliya Mudane Xamsa Cabdi Barre, ayaa hambalyo u diray Guddoomiyaha cusub ee Barlamaanka Jamhuuriyadda Federaalka Soomaaliya, Mudane Cabdulqaadir Maxamed Nuur, oo ku guueleystay in uu sii Hoggaamiyo Golaha Shacabka ee Baarlamaanka Federaalka Soomaaliya.

Ra’iisul Wasaaraha, ayaa Guddoomiyaha cusub ugu hambalyeeyay kalsoonida ay Xildhibaannada Golaha Shacabka u muujiyeen, isaga oo u rajeeyay in uu si hufan oo xilkasnimo leh u guto Waajibaadka Dastuuriga ah ee loo igmaday, isla markaana uu hormuud ka noqdo dadaallada lagu xoojinayo shaqada iyo doorka Baarlamaanka Federaalka Soomaaliya.

Mudane Xamsa Cabdi Barre, ayaa xusay muhiimadda ay leedahay wada-shaqeynta iyo isku-duubnida dhow ee ka dhexaysa Hay’adaha Dowladda gaar ahaan Xukuumadda iyo Barlamaanka, taasi oo mudnaan gaar ah siinaysa dardargelinta qorshayaasha Qaranka, si loo xoojiyo Dowladnimada, loona gaaro himilooyinka Shacabka Soomaaliyeed.

Ra’iisul Wasaare Xamsa, ayaa ugu dambayn Guddoomiyaha cusub ee Barlamaanka Jamhuuriyadda Federaalka Soomaaliya u rajeeyay mas’uuliyad gudasho, isaga oo caddeeyay in Xukuumadda DanQaran ay diyaar u tahay in ay si dhow ula shaqayso Hay’adaha Sharci-dajinta Dalka, si loo horumariyo Shuruucda iyo Siyaasadaha muhiimka u ah xasilloonida iyo mustaqbalka Soomaaliya.