𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐊𝐮-𝐱𝐢𝐠𝐞𝐞𝐧𝐤𝐚 𝐗𝐅𝐒 𝐨𝐨 𝐝𝐡𝐚𝐠𝐚𝐱-𝐝𝐡𝐢𝐠𝐚𝐲 𝐝𝐚𝐲𝐚𝐜𝐭𝐢𝐫𝐤𝐚 𝐁𝐢𝐲𝐨-𝐱𝐢𝐫𝐞𝐞𝐧𝐤𝐚 𝐒𝐚𝐚𝐛𝐮𝐮𝐧

Ra’iisul Wasaare Ku-xigeenka Xukuumadda Federaalka Soomaaliya Mudane Jibriil Cabdirashiid Xaaji Cabdi, ayaa maanta deegaanka Saabuun ee Gobolka Shabeellaha Dhexe kaga qeyb galay munaasabad lagu dhagax-dhigay dib-u-dayactirka Biyo-xireenka Saabuun, oo door muhiim ah ka qaadan doona maaraynta biyaha Webiga Shabeelle, waraabka beeraha iyo yareynta khatarta fatahaadaha.

Ra’iisul Wasaare Ku-xigeenka ayaa sheegay in dib-u-dayactirka Biyo-xireenka Saabuun uu yahay maalgashi toos ah oo lagu sameynayo dadka Soomaaliyeed, wax-soo-saarka dalka iyo mustaqbalka Soomaaliya, isaga oo xusay in mashruucani uu muhiimad gaar ah u leeyahay beeraleyda iyo bulshada ku nool dooxada Shabeelle.

“Maanta Saabuun uma aynaan iman inaan dhagax keliya dhigno. Balse waxaan u nimid in aan dib u soo nooleyno halbowlihii biyaha iyo beeraha ee deegaankan”. Ayuu yiri Mudane Jibriil.

Ra’iisul Wasaare Ku-xigeenka ayaa tilmaamay in Biyo-xireenka Saabuun, oo la dhisay sanadkii 1925-kii, uu muddo dheer ahaa mid ka mid ah kaabayaasha muhiimka ah ee lagu maareeyo biyaha Webiga Shabeelle, laguna taageero wax-soo-saarka beeraha.

Ra’iisul Wasaare Ku-xigeenka ayaa sheegay in Dowladda Federaalka Soomaaliya gaar ahaan Xukuumadda DanQaran ay mudnaan gaar ah siinayso horumarinta kaabayaasha biyaha iyo waraabka, maadaama ay laf-dhabar u yihiin kordhinta wax-soo-saarka gudaha iyo xaqiijinta sugnaanta cuntada.

Mudane Jibriil ayaa carrabka ku adkeeyay in mashruucan uusan ku koobnayn dib-u-dayactirka biyo-xireenka, balse uu qayb ka yahay Barnaamijka Kaydinta Biyaha ee Jowhar (JOSP) iyo dadaallada Dowladda ee lagu xoojinayo awoodda Soomaaliya ee maaraynta khayraadka biyaha.