𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐚𝐡𝐚 𝐨𝐨 𝐌𝐚𝐠𝐚𝐜𝐚𝐚𝐛𝐚𝐲 𝐆𝐮𝐝𝐝𝐢𝐠𝐚 𝐐𝐚𝐫𝐚𝐧 𝐞𝐞 𝐇𝐨𝐫𝐮𝐦𝐚𝐫𝐢𝐧𝐭𝐚 𝐗𝐢𝐫𝐟𝐚𝐝𝐚𝐡𝐚 𝐢𝐲𝐨 𝐒𝐡𝐚𝐪𝐨-𝐚𝐛𝐮𝐮𝐫𝐤𝐚

Muqdisho,(Wargeyska Dalka):- Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa magacaabay Guddi heerkiisu sarreeyo oo qaabilsan horumarinta Xirfadaha iyo Shaqo-abuurka.

Gogol-xaadhka hawsha Guddigan, oo muddo Sanad ka badan ka socotay Xafiiska Ra’iisul Wasaaraha, isla markaana ay wadeen Guddi-Hoosaadka Shaqo-abuurka Qaran, ayaa hadda soo gaartay waqtigii Dhaqangelinta.

Ra’iisul Wasaare Xamsa, oo cuskanaya qodobka 120-aad ee Dastuurka JFS, isla markaana eegaya muhiimadda ay leedahay dardargelinta Xirfadaha, Shaqo-abuurka, nidaamyada hagaajinta Suuqa Shaqada, iyo abuurista fursado Dhaqaale oo lagu horumarin karo Ganacsiyada gaarka loo leeyahay, ayaa magacaabay Guddiga Qaran ee Horumarinta Xirfadaha iyo Shaqo-abuurka.

Guddiga ayaa ka kooban Xafiiska Ra’iisul Wasaaraha iyo 13 wasaaradood oo udub-dhexaad u ah hawlaha Xirfadaha iyo Shaqo-abuurka.